Şüvəlan qəsəbəsinin "Nizami” küçəsində möminlərin birgə təşəbbüsü ilə "Ehtiyacın varsa, götür, ehtiyacın yoxdursa, as” adı altında mağaza fəaliyyətə başlayıb. Kampaniyanın məqsədi imkanlı şəxslərin sözügedən mağazaya təqdim etdiyi "ikinci əl” geyim ləvazimatlarını əhalinin kasıb təbəqəsinə pulsuz paylamaqdan ibarətdir.
Şübhəsiz ki, sözügedən kampaniya başlanandan mağazaya müxtəlif növdə paltarlar qoyulub və oraya dərhal yoxsul vətəndaşların axını başlayıb, qoyulan paltarların hamısı istifadə olunub. Maraqlıdır, kasıbların paltara olan tələbatının pulsuz qarşılandığı bu kimi mağazalardan Bakının digər rayonlarında, əyalətlərdə də açılmasına ehtiyac varmı? Bu ənənənin, bu tendensiyanın yayılması nə dərəcədə məqsədəuyğundur?
Məsələ ilə bağlı "Şərq”ə danışan Azad İstehlakçılar Birliyinin (AİB) sədri Eyyub Hüseynov bu addımı dəstəkləyib: "Belə təşəbbüslərin regionlarda da gerçəkləşməsinə çox ehtiyac duyulur. Bu, çoxdan həyata keçirilməli idi. Çox insanın evində geyinmədiyi paltarlar var. O paltarları yuyub, ütüləyib aparıb həmin mağazadan asmaq təqdirəlayiq, əməlisaleh bir iş olardı. Çox mühüm məsələdir. 2001-ci ilin 31 dekabr tarixində bir qazan aş hazırlatdırıb "Jiquli”nin arxasına qoydum, qızımı da özümlə götürdüm və o aşı işıqforda dayanan uşaqlara payladıq. Qalanlarını isə uşaq evindəki uşaqlara apardıq. Bu, balaca bir vətəndaş istəyi idi. Şüvəlanda açılan mağaza da yaxşı bir ənənədir və bu ənənə geniş yayılmalıdır. Hesab edirəm ki, məlum təşəbbüs pulsuz paltarların verilməsi ənənəsinin başlanğıcını qoydu”.
Ayyət Əhməd
