"Azərbaycanda sürücülər çox səbrsizdir və qayda pozmağa meyllidir”.
Bunu "Sherg.az”a bu il yanvarın 1-dən noyabrın 10-dək Bakı şəhəri üzrə inzibati tənbeh tədbirləri çərçivəsində 590 mindən artıq inzibati protokol tərtib olunmasının səbəblərini izah edərkən Avtosfer.az saytının baş redaktoru, nəqliyyat eksperti Elməddin Muradlı deyib. O bildirib ki, sürücülər ətrafda yol polisini, kameraları görmədikdə qayda pozmağa meyl edirlər:
"Hadisə baş verəndə isə "görmədim”, "tələsirdim”, "bilmədim” şəklində bəhanələr səsləndirirlər. Qayda pozuntusuna görə saxlanılan 100 sürücüdən 90-ı "tələsirdim” ifadəsini işlədir. Tələsməyin sonunun nə ola biləcəyini sürücülər anlasa, yol nəqliyyatı hadisələri, qayda pozuntuları da azalar. Sadəcə mahiyyətini dərk etmirlər.
Sürücüləri bu addımlardan yayındırmaq üçün qəzaların necə baş verdiyini izah etməli, bu mövzuda sosial çarxlar hazırlamalıyıq. Məsələdə lokomativ rolunu isə Dövlət Yol polisi oynamalıdır. Polisdə yol ayırıcılarında qəzaların necə baş verməsini əks etdirən minlərlə kadr var. Onları seçib, hissə-hissə sürücülərə nümayiş etdirmək olar. Bunun müəyyən təsiri olar.
Əksər yol nəqliyyat hadisələri yol polisinin olmadığı yerlərdə, xüsusilə gecələr baş verir. Gecə piyadaların görülməsi də çətinləşir. Son vaxtlar işıqforun qırmızı işığında keçən sürücülərin sayı azalıb. Əvvəl buna "bərkgedən” hərəkət kimi baxırdılar. İndi isə bu qınaq obyektinə çevrilib. Bu yaxşı haldır.
Yalnız o halda sürücünün qayda pozmasına göz yummaq olar ki, maşında xəstə, yaxud ağır vəziyyətdə olan, xəstəxanaya çatdırılmalı adam var. Yaxud dövlət əhəmiyyətli mühüm iş üçün həmin şəxs hərəkət edir”.
Qayda pozuntularının əksəriyyətinin sürücülərin yeni qaydalara laqeydliyi ilə əlaqələndirən ekspertin sözlərinə görə, sürücülər mətbuatı, televiziyaları izləməli, yeni tətbiq edilən dəyişiklikləri bilməlidir:
"Pərdələrin istifadə icazəsinin yekunlaşması, maşınların vaxtlı-vaxtında texniki baxışdan keçirilməsi və s. barədə məlumatlı olmamaq sürücülərin cərimələnməsinə gətirib, çıxarır. Ona görə, yol hərəkəti qaydaları ilə bağlı problemlərlə qarşılaşmamaq üçün mətbuatı, sosial şəbəkələri və ya televiziyaları daim izləmək vacibdir”.
Qeyd edək ki, bu il yanvarın 1-dən noyabrın 10-dək Bakı şəhəri üzrə 527 yol-nəqliyyat hadisəsi qeydə alınıb. Hadisələr nəticəsində 166 nəfər ölüb, 461 nəfər xəsarət alıb. Bakı şəhər BPİ Dövlət Yol Polisi İdarəsinin Yol Hərəkətinin Təhlükəsizliyinin Təbliği və İctimai qurumlarla Əlaqə bölməsinin rəisi, polis polkovniki Vaqif Əsədov bildirib ki, ötən ilin müvafiq dövrü ilə müqayisədə 61 hadisə, 4 ölüm, 145 xəsarət faktı azalıb, eyni zamanda, xəsarət dərəcələri yüngülləşib.
Aysel Aslan
