"Əlilliyin saxta olduğunu sübut etmək, bu formada əlillik alan şəxslərdən ödənilən vəsaitləri geri almaq o qədər asan proses deyil”.
Bunu "Sherg.az”a Əmək və Əhalinin Sosial Müdafiəsi Nazirliyi (ƏƏSMN) tərəfindən əlilliyin qiymətləndirilməsi və reabilitasiya sisteminin təkmilləşdirilməsi məqsədilə görülən tədbirləri qiymətləndirərkən iqtisadçı, millət vəkili Vahid Əhmədov söyləyib.
Onun fikrincə, nazirlik atdığı addımlarla indiyə qədər saxta əlillik üçün verilən müavinətləri qaytara bilməyəcək:
"ƏƏSMN tərəfindən yaradılan xüsusi komissiya bu məsələnin üzərində çalışır. Saxta yolla əlillik dərəcəsi alan şəxslərə bundan sonra vəsait ödənilməyəcək. Amma nəzərdə tutulduğu kimi saxta əlillərə indiyə qədər ödənilən vəsaitləri geri qaytarmaq çətindir. Bunun üçün həmin əlillik statusunu verən, təqaüd ayıran şəxsləri cəzalandırmaq lazımdır. Çünki qeyri-qanuni əməl birbaşa həmin məsələdə səlahiyyətli olan şəxsin üzərindədir. Üstəlik, bu məsələni sübut etmək çətindir. Saxta əlliliyin sübut edilməsi, vəsaitlərin geri istənilməsi məhkəmə mövzusu ola bilər, gələcəkdə problemlər yaradar”.
Risk qrupu xəstəlikləri ilə əlaqədar yanlış əlillik təyinatlarının alınmasına da toxunan Vahid Əhmədov diqqətə çatdırıb ki, bu xəstəliklərə şəkər, əsəb sistemi, qan-damar sistemi, ürək problemləri ilə əlaqədar xəstəliklər və s. nəzərdə tutulur.
Qeyd edək ki, əlilliyin qiymətləndirilməsi və reabilitasiya sisteminin təkmilləşdirilməsi məqsədilə 2018-ci ilin may ayının əvvəlində Əmək və Əhalinin Sosial Müdafiəsi Nazirliyində yaradılmış İşçi Qrupu tərəfindən aparılan araşdırmaların ilkin nəticələrinə əsasən, cari ilin birinci rübündə risk qrupu xəstəlikləri ilə əlaqədar yanlış əlillik təyinatları barədə qərarlar dərhal ləğv edilməklə, bu şəxslərə yönələn pensiya, müavinət və təqaüd ödənişləri dayandırılıb və onlara ödənilmiş vəsaitin dövlət büdcəsinə bərpası üçün təxirəsalınmaz tədbirlər görülüb.
Aysel Aslan
