"Vahid kart sisteminə keçid nəqliyyat sahəsindəki pərakəndə vəziyyəti aradan qaldırmağa kömək edəcək”.
Bunu Sherg.az-a paytaxtda fəaliyyət göstərən bütün sərnişin avtobuslarının vahid kart sisteminə keçməsinin faydalarından danışarkən Avtosfer.az saytının baş redaktoru, nəqliyyat üzrə ekspert Elməddin Muradlı deyib.
O, kart sisteminə keçidin nəqliyyatdakı problemləri qismən aradan qaldıracağını düşünür:
"Avtobusların kart sistemi ilə işləməsi nəticəsində vergidən yayınmaq mümkün olmur. Büdcəyə xeyli vəsait toplanır. Sürücülər maaş sistemi ilə işlədiyindən heç bir halda bir-biri ilə yarışlara çıxmır. Dayanacaqlarda digərlərini üstələmək üçün mane törətmirlər. Amma sürücülər maaş sisteminə keçirilməsə, bəzi problemlərin düzəlməsi çətindir. Avtobus sürücülərinin plan sistemi ilə işləməsi saxlandıqca, lüks avtobus, hətta təyyarə də gətirilsə, onlar əməllərindən əl çəkməyəcəklər ki, günün sonunda 5 manat qazancı artıq olsun.
Hazırda bir qədər narazılıq var ki, çox avtobuslarda kart sistemi qurulmayıb. İnsanların əksəriyyəti isə hələ də kartlardan istifadə etmir. Ona görə də, kart sisteminə keçməyən avtobuslar istədikləri yerdə saxlayır, istədikləri yerdə sərnişin mindirib, düşürürlər. Kart sistemi ilə işləyən daşıyıcı şirkətlər isə istər-istəməz narazılıq edir ki, biz bu qədər vəsait xərcləyib, kart sistemi qurduğumuz təqdirdə, başqaları bunu təmin etmir. Buna baxmayaraq, nağd işləyən avtobuslar daha çox işləyir və daha çox qazanır. Bütün bunları nəzərə aldıqda vahid kart sisteminə keçid bir qədər tez olarsa, daha yaxşı nəticələr əldə etmək mümkünləşər”.
Qeyd edək ki, Bakı Nəqliyyat Agentliyinin baş direktoru Vüsal Kərimli 2018-ci ilin sonuna qədər Bakıda sərnişindaşıma üzrə fəaliyyət göstərən bütün avtobusların kart sisteminə keçəcəyini açıqlayıb.
Aysel Aslan
