"Bədənə döymə vurulması mentalitetə uyğun olmayan çağdaş "mədəniyyətdir””.
Bunu "Sherg.az”a dəriyə tatuirovka vurulmasının fəsadlarından danışarkən "Turan” klinikasının baş həkimi, dermatoloq Həmid Mustafayev deyib.
Məlum addımları kəskin tənqid edən həkimin sözlərinə görə, bu, rəssamlığın bir növüdür:
"Əslində bu ifrat incəsənətdir. İnsanlar hər yerə rəsm çəkdilər, sonda isə öz bədənlərinə müxtəlif döymələr etməyə qərar verdilər. Döymə vurulmasını yolunu azmış insanların əməlləri kimi qiymətləndirmək olar.
Bir fizioloji orqanizmə kənardan müdaxilə edilməsi ciddi tibbi fəsadlar da yaradır. Bu proseduralarda bədənə yeridilən mürəkkəb yad maddədir. Belə döymələrdən sonra dəri xərçəngi xəstəlikləri, eqzemalar, allergik dermatitlər və s. yarana bilər. Tatuların bu kimi fəsadlarının bəzən müalicəsi belə mümkün olmur.
Döymə vurulmasının hansı şəraitdə həyata keçirilməsi aktualdır. Çünki bu proseduraların əksəriyyəti adi salonlarda həyata keçirilir, heç bir sterilizasiya qaydalarına əməl olunmur. İnsanlara müxtəlif infeksiyalar, sifilis, hepatit kimi ağır xəstəliklər yoluxdurulur. Nəticədə gənclərin adi əyləncə, zövq, dəb kimi yanaşdığı döymələr ağır nəticələri ilə qalır”.
Qeyd edək ki, son illər gənclər arasında yayılan döymə vurulması zamanla ciddi fəsadlara gətirib çıxarır. Elə, Polşanın Vrotslav şəhərində yaşayan gənc qız da gözlərinə tatu vurdurarkən görmə qabiliyyətini itirib.
Aysel Aslan
