İş dəftərləri və dərsliklərə əlavə digər vasitələr tədris proqramına daxil edilmir”.
Bunu "Sherg.az”a orta məktəb şagirdləri üçün nəzərdə tutulmuş iş dəftərlərinin qiymətləri və perspektivi barədə danışarkən təhsil eksperti, tarix üzrə fəlsəfə doktoru Kamran Əsədov deyib.
O diqqətə çatdırıb ki, rəsmi şəkildə Təhsil Nazirliyinin təsdiq etdiyi dərs vəsaitləri sırasında heç bir iş dəftərinin adı yoxdur:
"Qanunvericiliyin tələbinə uyğun olaraq iş dəftərlərinin orta ümumtəhsil məktəblərində istifadəsi birmənalı şəkildə yolverilməzdir. Təəssüf ki, bəzi tədris prosesini düzgün qurmayan, keyfiyyətli dərs şəraiti qura bilməyən və öz rahatlığını düşünən müəllimlər şagirdlərə iş dəftərləri aldırır ki, vaxtın çoxu ona sərf edilsin.
Orta ümumtəhsil məktəblərində tədrisin aparılması haqqında qaydalarda göstərilir ki, Azərbaycan Respublikasının Təhsil Nazirliyi tərəfindən təsdiq edilmiş dərsliklərin hər birində paraqrafın sonunda daxilində və yanında kifayət qədər həmin mövzunu əhatə edən sual və tapşırıqlar var.
İş dəftərləri müəllimlər tərəfindən xüsusi maraq qarşılığında aldırılır. Müəllimlər o məqsədlə bunu aldırır ki, şagirdlər çətin tapşırıqları həll edə bilməsinlər və müəllimə repetitor kimi müraciət etsinlər. İş dəftərləri sadəcə repetitorluğa xidmət edir.
Digər tərəfdən orta ümumtəhsil məktəblərində təsdiq edilib, müəllimlərə istifadə üçün verilən iş dəftərlərinin yaş xüsusiyyətləri, ağırlıq dərəcəsi şagirdlərin psixologiyasına uyğun deyil. Çünki hər hansı təhsil idarəçiliyi tərəfindən həmin iş dəftərlərinin məzmunu, formatı təsdiq edilməyib. Bu istənilən müəllif, kollektiv tərəfindən yazılıb, dərsliklərə əlavə vasitə kimi çap olunub. Lakin dediyim kimi, orta məktəblərdə bunların istifadəsi yolverilməzdir”.
Ölkə başçısının sərəncamını xatırladan K.Əsədov deyib ki, orta məktəb şagirdlərinin 1-11-ci sinfə qədər bütün dərs vəsaitləri dövlət büdcəsi tərəfindən onlara verilir:
"Bu, o deməkdir ki, ölkə prezidenti təhsilin əlçatan olmasına çalışır. Təhsildə bərabər imkanların yaradılması Azərbaycan Respublikası Prezidentinin 2013-cü ildə imzaladığı Təhsilin inkişafında Dövlət Strategiyasında öz əksini tapıb.
Hər valideynin imkanı yoxdur ki, şagird övladlarının hamısı üçün həmin iş dəftərlərini alsın. Yuxarı siniflərdə Dövlət İmtahan Mərkəzinin ayrı-ayrı fənlər üzrə dərc etdirdiyi test tapşırıqları var. Müəllimlər bunu da aldırırlar. Müəllimlər orta məktəblərdə yüksək səviyyədə dərs keçsəydilər, şagirdlər müəllim yanına getməzdilər. İş dəftərlərindəki tapşırıqlar da heç bir yeni bilik formalaşdırmır. Birmənalı olaraq, bundan istifadənin yolverilməz olduğunu düşünürəm”.
Aysel Aslan
