Aztəminatlı ailələrdən olan tələbələrə verdiyi təhsil haqqı üzrə kreditlər faizsiz olub. "Maarifçi” Tələbə Kredit Fondunun məlumatına görə, kredit almaq istəyənlər üçün müraciətlərin qəbuluna başlanılıb.
Təqdim olunacaq təhsil kreditləri 2017-2018-ci tədris ili üzrə təhsil alan, aztəminatlı ailələrdən olan tələbələrin təhsil haqqı borcu üçün nəzərdə tutulub. Bəzi məlumatlarda isə bildirilir ki, tələbələrin kredit əldə edə bilməsi üçün təklif olunan şərtlər ciddi olduğundan onların əksəriyyəti bu imkandan yararlana bilmir.
Maraqlıdır, belə məlumatların yayılması nə dərəcədə həqiqətdir? Görəsən, ekspertlər bu cür kreditlərin verilməsini əlçatan hesab edirlərmi?
Tələbələrə təhsil kreditlərinin verilməsi ilə bağlı inkişaf etmiş ölkələrdə xüsusi praktika olduğunu deyən İqtisadi və Sosial İnkişaf Mərkəzinin sədri Vüqar Bayramov bildirib ki, həmçinin ölkəmizdə belə praktikanın tətbiqinə ehtiyac var. İqtisadçının sözlərinə görə, tələbələrə faizsiz təhsil kreditlərinin verilməsi üçün dövlət büdcəsindən vəsait ayrılmasına ehtiyac var: "Tələbələrin əksəriyyəti təhsil haqlarını və bir sıra xərcləri ödəməkdə çətinlik çəkirlər. Onların təhsil kreditindən istifadə etməyə və xərclərin ödənilməsində yardıma ehtiyacları var.
Aydındır ki, Kommersiya bankları öz vəsaitləri hesabına kreditlər versə, onlar bunu faizli şəkildə təklif edərlər. Təbii ki, bu, tələbələr üçün arzuolunan deyil. Ona görə də tələbə kreditlərinin faizsiz olması vacibdir və bunun üçün dövlət büdcəsindən bu istiqamətdə vəsaitin ayrılmasına ehtiyac var.
Əgər dövlət büdcəsindən bu istiqamətdə vəsaitin ayrılması təmin olunarsa, sözsüz ki, faizsiz kreditlərin verilməsi mümkün olar və tələbələr bu kreditlərdən istifadə edə bilərlər. Bunun üçün meyarların müəyyənləşməsinə ehtiyac var.
Xüsusən aztəminatlı tələbələrə belə bir imkanın tanıdılması lazımdır. Bütün hallarda tələbələrə faizsiz kreditlərin təklif edilməsi vacibdir və dövlət qurumları çalışmalıdır ki, daha qısa zamanda tələblərin bu cür kreditlərdən istifadə imkanlarına şərait yaradılsın”.
Yeganə Bayramova
