ABŞ-ın Türkiyədəki diplomatik nümayəndəlikləri "məhdud sayda” vizaların verilməsini bərpa ediblər. Buna adekvat olaraq, rəsmi Ankara Amerika diplomatlarına vizaların verilməsini qismən bərpa edə biləcəyini bildirib.
Vaşinqtonun vizalarla bağlı yumşaldıcı addımı Türkiyənin baş naziri Binəli Yıldırımın ABŞ-a səfəri çərçivəsində atılıb. Baş nazirin Amerika rəsmiləri ilə görüşündə terrorçuluqla mübarizə, tərəflər arasında siyasi, iqtisadi və hərbi sahələrdə münasibətlər barədə danışıqlar aparılacaq. Bu, Donald Trampın hakimiyyətə gəlişindən sonra Türkiyədən Vaşinqtona baş nazir səviyyəsində ediləcək ilk səfər olacaq.
Tərəflərin münasibəti ilə bağlı "Şərq”ə danışan Qərb Universitetinin professoru, politoloq Fikrət Sadıqov deyib ki, Türkiyə dövləti Amerika konsulluğunda öz maraqlarına qarşı işləyən casusu həbs edəndən sonra iki dövlət arasında münasibətlər gərginləşdi. Viza sisteminə qarşılıqlı qadağalar qoymaq həmin hadisədən sonra başladı. Amma son günlər yaşanan proseslərdən sonra ABŞ çox incə diplomatik addım atdı:
"Vaşinqton gördü ki, Türkiyə Rusiya ilə münasibətləri sıxlaşdırır. İki ölkə mühüm layihələr həyata keçirir. Amerikanı idarə edənlər yaxşı başa düşürlər ki, Türkiyənin Ağ Evə qarşı olan dövlətlərlə sıx əlaqə qurmasına icazə vermək olmaz. ABŞ-ın yumşalması ilk növbədə Türkiyə-Rusiya əlaqələrinin inkişafı ilə bağlıdır. Ona görə də Vaşinqtonun viza ilə bağlı addımını diplomatik jest saymaq olar”. Ekspertin sözlərinə görə, Türkiyənin NATO-nun qabaqcıl üzvlərindən biri olduğunu unutmaq olmaz: "Təşkilat çərçivəsində üzv ölkələrin bir-biri ilə əməkdaşlığı zəruri məsələdir. Baş nazir Binəli Yıldırımın AŞB-a səfəri və səfər öncəsi atılan yumşaldıcı addımlar münasibətlərin normala dönməsi, xüsusən viza rejiminin bərpası üçün yaxşı imkan yaradacaq”.
İsmayıl
