Samir Əsədli: “Moskvanın avtoritar hakimiyyəti Azərbaycanı özündən asılı etməkdə maraqlıdır”
Dünən Ümumrusiya Azərbaycan Konqresinin apelyasiya şikayətinə baxılıb. Rusiya Ali Məhkəməsinin Apelyasiya Kollegiyası ÜAK-ın şikayətini təmin etməyib və birinci instansiya məhkəməsinin qərarını qüvvədə saxlayıb.
ÜAK prezidenti Fazil Qurbanov bildirib ki, qərardan Ali Məhkəmənin Rəyasət Heyətinə müraciət olunacaq. Əslində apelyasiya məhkəməsindən müsbət qərarın çıxacağı gözlənilirdi. Ən azından son aylar yaşanan müəyyən proseslərin fonunda buna ümid edilirdi. Ancaq belə demək mümkündürsə, son ümidlər də puç oldu. Uzun zamandır müzakirə olunan ÜAK-ın qeydiyyatının ləğvi müxtəlif cür şərh edilir. Bir qisim məsələnin ciddi olduğunu düşünür və ölkəmizə təzyiq kimi dəyərləndirir. Digər tərəf isə hesab edir ki, bir qurum bağlanırsa, yerinə başqa təşkilat yaratmaq və yola davam etmək lazımdır.
Qərarla bağlı "Şərq”ə danışan Azərbaycan Milli İstiqlal Partiyasının funksioneri, politoloq Əli Oruclu deyib ki, ÜAK-ın bağlanmasına faciə kimi baxmaq lazım deyil:
"ÜAK-ın qeydiyyatının ləğv edilməsini Azərbaycana qarşı təzyiq kimi qiymətləndirməzdim. Azərbaycana təzyiqlər daha çox Qərbdən edilir. Rusiyalı rəsmilərin dediyinə görə, qeydiyyat məsələsində hansısa prosedur qaydalar pozulub. Məncə, irəliyə baxmaq və Konqresdən daha güclü, daha mütəşəkkil təşkilat yaratmaq mümkündür. Bu məsələdə ilişib qalmaqdansa, yola davam etmək daha faydalıdır. Amma bu heç də o demək deyil ki, hüququn verdiyi imkanlardan imtina edilməlidir. İstənilən məhkəmələrə müraciət edilə bilər. Lakin düşünmürəm ki, ÜAK-ın bərpası Rusiya məhkəmələrində mümkün olsun”.
Vətəndaş Həmrəyliyi Partiyasının Mərkəzi İcra Aparatının rəhbəri Samir Əsədli isə qərarı Azərbaycana təzyiq kimi xarakterizə edib:
"Rusiya Ali Məhkəməsinin qərarı müxtəlif cür dəyərləndirilir. İstənilən halda Rusiya Azərbaycana təzyiq edir və bu imkana sahib olduğunu hər fürsətdə gündəmə gətirir. Moskvanın avtoritar hakimiyyəti Azərbaycanı özündən asılı etməkdə maraqlıdır. Kreml tərəfindən atılan bütün addımlar bu istiqamətdə həyata keçirilir. ÜAK-ın ləğvi də onlardan biridir”.
İsmayıl
