Təbabət yarandığı gündən indiyə qədər ürək-damar sistemi xəstəlikləri həm klinik gedişatına, həm də ölüm hallarının artmasına görə həmişə ilk sırada olub”.
Bunu "Sherg.az”a ürək-damar problemləri, ürək damarının tıxanması və bunların səbəblərindən danışarkən tibb və fəlsəfə üzrə fəlsəfə doktoru, həkim Şəmsiyyə Namazlı deyib. O bildirib ki, ürək-damar problemləri bu gün artmaqda davam edir:
"Bunun səbəbləri çoxdur. Ürək damar sistemi xəstəliklərinin artmasına başlıca səbəblər zərərli vərdişlər, siqaret, spirtli içkilərdən istifadə, qeyri-düzgün qidalanma, heyvani mənşəli qidalara üstünlük verilməsi, bununla əlaqədar enerji kütləsinin sərf edilməməsidir. Üstəlik, stress də bu məsələdə daha çox rol oynayır. Orta statistik rəqəmləri götürsək, hər siqaretdən sonra damarlar 20 dəqiqə spazma halında sıxılmış vəziyyətdə qalır. Bu da ürək əzələsində qidalanmanın zəifləməsinə gətirib çıxarır.Sonrakı sıralarda xolestrin və onun tərkibi ürək damar xəstəliklərinin artmasının səbəbləridir. Məsələ bundadır ki, indi bu xəstəliklər cavanlaşır. 20-ci əsrin əvvəllərində yaşlılar arasında ürək xəstəlikləri daha çox idisə, indi bu xəstəliklər cavanlarda daha çox olur. Müşahidə edirik ki, açıq ürək əməliyyatları, damar dəyişilməsi və s. proseslərə məcbur qalan cavanların sayı artıb.
İnsanların özlərindən də çox şey asılıdır. Heç kim yoxlanmır, "chek-up” müayinələrdən keçmir. Vaxtaşırı damarların vəziyyətini yoxlamaq yazımdır ki, problem olub-olmadığı bilinsin. O zaman həkimə müraciət edirlər ki, artıq damarlarda tıxanmalar yaranır, əməliyyata ehtiyac olur.
Bu xəstəliklərin güclənməsində mövsümi dəyişikliklər, günəşdə olan parçalanmalar, meteohəssas insanların dəyişkən havalardan təsirlənməsi və s. də təsir göstərir. Havaların yayda həddindən artıq isti, qışda həddindən artıq soyuq keçməsi ürək-damar xəstəliyi olan şəxslərə daha da mənfi təsir edir. Baxın, evdə kondisioner işləyir, bayırda isə 39-40 dərəcə istidir. Bir anda bayırdakı isti havadan içəridəki soyuq havaya daxil olmaq ziyanlıdır. Təəssüf ki, insanlar ürək damar sistemi xəstəliklərinə gətirib çıxaran faktları diqqətə almır, temperatur dəyişikliyinə fikir vermir”.
Aysel Aslan
