Oktyabr ayının birinci yarısında ATƏT-in Minsk Qrupunun həmsədrləri prezidentlərin görüşünü təşkil etmək üçün Ermənistana səfər edəcəklər. Bu barədə Ermənistan xarici işlər naziri Edvard Nalbandyan məlumat verib.
Nyu-Yorkda azərbaycanlı həmkarı Elmar Məmmədyarovla keçirdiyi görüşə toxunan erməni nazir bildirib ki, görüşdə prezidentlərin görüşünün təşkili və həmsədrlərin regiona səfərinin qrafiki müzakirə olunub: "Həmsədrlərin səfərinin məqsədi prezidentlərin görüşünün təşkilidir”. Nazirlərin təmasını müsbət dəyərləndirən BMT-nin baş katibi Antonio Quterres prezidentlər arasında planlaşdırılan görüşün tərəflər arasında etimad yaradacağını deyib. Onun sözlərinə görə, əsas məsələlərlə bağlı kompromisin tapılması üçün siyasi iradə lazımdır. Müşahidə olunan odur ki, həmsədrlər prezidentləri bir araya gətirmək üçün ciddi səy göstərirlər. Ekspertlər isə hesab edirlər ki, düşmənin təcavüzkar və təxribatçı mövqeyi dəyişmədiyi müddətcə reallaşan istənilən görüş nəticəni verməyəcək.
Məsələ ilə bağlı "Şərq”ə danışan politoloq İlqar Vəlizadə deyib ki, prezidentlərin görüş ehtimalının real olub-olmadığı həmsədrlərin regiona səfərindən sonra bəlli olacaq. Ekspert bildirib ki, vasitəçiləri bölgəyə gətirən səbəb Nyu-Yorkda xarici işlər nazirlərinin görüşü zamanı gündəmə gətirilmiş təklifləri sənədləşdirmək və münaqişə tərəflərinə təqdim etməkdir:
"Vasitəçilərin aktivliyi bununla bağlıdır. Münaqişə tərəflərinin liderləri onlara təqdim edilən təkliflərə münasibət bildirməlidir. Əgər təkliflər tərəflər üçün məqbul hesab edilərsə, prezidentlərin görüşü baş tuta bilər. Əks halda həmsədrlərin ortaya atdığı təkliflər geri çevriləcək və görüş reallaşmayacaq”.
İsmayıl
