"Müxtəlif dezinformasiyalar yayan saytlara dəstək göstərmək, vəsait xərcləmək əvəzinə, peşəkar medianın inkişafı istiqamətində addım atmaq lazımdır”.
Bunu "Sherg.az”a Gəncə və Mingəçevir hadisələri zamanı təxribat xarakterli çağırışlar edən saytlar və sosial mediadakı səhifələrə qarşı mübarizədən danışarkən Beynəlxalq Avrasiya Mətbuat Fondunun sədri Umud Rəhimoğlu deyib.
O qeyd edib ki, bu qüvvələr eyni dəst-xətti olan şəbəkə formasında fəaliyyət göstərir:
"Daha çox Azərbaycanın mənafeyinə zidd mövqedən çıxış edən , xalqı itaətsizliyə səsləyən bu saytlar qanunazidd əməllərə yol verirlər. Azərbaycan münaqişə şəraitində olsa da, 1 milyondan çox vətəndaşı qaçqın və məcburi köçkün vəziyyətinə düşsə də, torpaqlarının 20 faizi işğal olunsa da, təkbaşına bütün bu problemlərlə mübarizə aparır. Torpaqlarımızın azad edilməsi istiqamətində Azərbaycan ardıcıl siyasət yürüdür və hər gün addım-adım Qarabağımıza yaxınlaşırıq.
Bu prosesdə Azərbaycan mediası Azərbaycan xalqını həmrəyliyə, mütəşəkkilliyə, birliyə çağırmalı, vətəndaş təəssübkeşliyi göstərməlidir. Ona görə, dövlətçiliyimə zərər verən, müstəqilliyimizə ziyan vuracaq çağırışların, təxribat xarakterli addımların həyata keçirilməsi düzgün deyil. Biz bu cür qurumların fəaliyyətini pisləməliyik. Ölkəmizdə peşəkar onlayn və yazılı medianın dəstəklənməsinə böyük ehtiyac var. Bu istiqamətdə fəaliyyətimizi gücləndirməliyik”.
Qeyd edək ki, iyulun 3-də Mingəçevir İES-də baş verən qəza və iyulun 10-u Gəncədə törədilən iğtişaşlar zamanı "nuraz.com", "abna.com", "aran.news", "qafqaz.ir", "rasthaber.com", "ru-clip.ru" kimi saytlar həqiqətə uyğun olmayan, milli maraq və təhlükəsizliyə zidd, cəmiyyətdə xaotik əhval-ruhiyyə yaradan təxribat xarakterli dezinformasiyalar tirajlayıblar.
Aysel Aslan
