"Xəstə və xəstə yaxınları həkimdən narazı olduğu təqdirdə, ödənişin qaytarılması qanunvericiliklə tənzimlənməlidir”.
Bunu "Sherg.az”a həkim Zəlimxan Məmmədli deyib.
O bildirib ki, diaqnoz tam qoyulmamış, əməliyyat aparmaq olmaz:
"Bəzən xəstələr iddia edir ki, həkim yanlış əməliyyat aparıb. Lakin müasir tibbi texnologiyaların da inkişaf etdiyini nəzərə alsaq, dəqiq diaqnoz qoyulmadan xəstəni yarıb, sonra tikmək olmaz. 21-ci əsr insanı həkimə gedir ki, narahatlığı aşkar edib, müalicə etsinlər. Əgər səhlənkarlıq varsa, bu sübut olunarsa, diaqnoz düzgün qoyulmazsa, müasir metodlardan istifadə olunmadan, subyektiv mülahizələrlə əməliyyatların olunması yanlışdır. Xəstə hər istədiyində ödədiyi pulun qaytarılması həyata keçirilə bilməz. Hüquq nəyi nəzərdə tutursa, onu etmək lazımdır. Məhkəməyə müraciət etmək vacibdir. Əgər həkimin səhvi sübuta yetirilərsə, məhkəmə qərar verərsə, xəstəyə və ya xəstə yaxınlarına dəyən mənəvi təzminat ödən ilməlidir”.
Qeyd edək ki, Laçından olan məcburi köçkün Səmiyyə Hüseynova, Bakı Medikal Plazadan və orada ürək cərrahı işləyən həkim məşhur kardioloq Üzeyir Rəhimovdan şikayətçidir. Səmiyyə xanım bildirib ki, oktyabrın 20-də həyat yoldaşı Zakir Hüseynovu ürəyində yaranan problemlə bağlı klinikaya aparıblar. Elə həmin gün də 64 yaşlı Zakir Hüseynov orada Üzeyir həkim tərəfindən əməliyyat edilib. Lakin əməliyyatdan sağ çıxmayıb.
Biləcəridə 1 otaqlı yataqxana binasında məskunlaşan məcburi köçkün Səmiyyə xanım deyir ki, yoldaşının əməliyyat üçün Bakı Medikal Klinikaya ödədikləri pulu borc-xərc kimi toplayıblar. Həkimin və xəstəxana işçilərinin onunla çox kobud rəftar etdiyini diqqətə çatdıran şikayətçi ödədiyi pulun geri qaytarılmasını tələb edir.
Aysel Aslan
