“Gəncliyi taleyin ümidinə buraxmaq olmaz”
“Azərbaycan gəncləri ölkəmizdə perspektiv, inkişaf, gələcək görə bilmirlər”
“Bacarıqlı vətəndaşlar öz karyeralarını xaricdə qurmağa üstünlük verirlər”
Almaniyada yaşayan azərbaycanlı jurnalist Fərahim İlqaroğlu öz "Facebook" səhifəsində paylaşım edərək peşəkar azərbaycanlı həkimlərin xarici ölkələrə üz tutduğunu qeyd edib. O, paylaşımında rüşvət və korrupsiyalaşmış bir səhiyyə sistemində çalışmaq istəməyən azərbaycanlı həkimlərin Almaniyada karyeralarına davam etdiklərini bildirib:
“Hazırda Almaniyanın məşhur xəstəxana və klinikalarında xeyli azərbaycanlı həkim və tibbi personal çalışır. Bəziləri artıq özünün klinikasını açaraq fəaliyyət göstərməyə başlayıblar. Sonda isə qazananın onlar, itirənin isə Azərbaycan olur”.
Yalnızca tibb sahəsinin peşəkarları deyil, digər sahələrin də bacarıqlı gəncləri daha perspektivli ölkələrə gedərək gələcəkləri üçün gözəl şərait yaradırlar. Xüsusilə, gənclər Qərb ölkələrindəki inkişaf etmiş texnologiyalara, gənclərə dövlətlərin dəstəyini görərək oraya köçüb professionallaşmağa meyil edirlər.
Həkimlərimizin xarici ölkələrə gedərək karyeralarına davam etmələri ilə bağlı "Sherg.az"a danışan ictimia-siyasi xadim, həkim Zəlimxan Məmmədli bildirib ki, gəncliyə dövlət dəstəyi olmazsa, ölkədən getmək istəyənlərin sayı daha da artacaq:
“Səbəb ölkəmizdəki təhsil və milli strateji inkişaf siyasətinin yarıtmazlığıdır. Bir ölkədə monopoliya, korrupsiya, qanunsuzluq varsa, bir çox sahədə problemlər yaranacaq. Gəncliyi taleyin ümidinə buraxmaq olmaz.
Azərbaycan gəncləri burada perspektiv, inkişaf, gələcək görə bilmirlər. Bacarıqlı vətəndaşlar öz karyeralarını xaricdə qurmağa üstünlük verirlər.
Azərbaycanda peşəkar həkimlərə çox ehtiyac var. Həkimlər toplumun sağlamlığına qarantlı olan peşə sahibləridir. Əgər həkimə 250-300 manat verib burada girov saxlamaq istəyirlərsə, səhiyyə inkişaf etməyəcək.
Hər kəs yaxşı həyat standartlarının olmağını istəyir. Burada perspektiv görə bilmədikləri üçün Avropanın, Türkiyənin universitetlərinə önəm verib orada karyeralarına davam edirlər.
Orada bir müddət işləyib geri qayıdan həkimlər səhiyyə mütəxəssisi kimi geri dönürlər. Azərbaycan gəncliyinə hökumət dəstək verməlidir. Gəncliyin inkişafının tək həlli budur”.
Xanlar ƏLİBƏY
