Bu gündən Bakı-Sumqayıt istiqamətində 594 nömrəli yeni ekspres avtobus marşrutu istifadəyə verilib.
Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) xəbər verib.
Məlumata görə, marşrut üzrə müasir və komfortlu avtobuslar fəaliyyət göstərir.
"Sumqayıt Avtovağzalından yola düşən avtobusların son dayanacaq məntəqəsi “20 Yanvar” metrostansiyası müəyyən edilib. Əks istiqamətə isə avtobuslar “20 Yanvar” metrostansiyasının digər çıxışında (Sumqayıt istiqamətinə olan çıxışın yaxınlığında) dayanır. Gedişhaqqı 0,80 qəpik müəyyən olunub",- deyə məlumatda qeyd edilib.
Qeyd edək ki, Bakı Beynəlxalq Avtovağzal Kompleksindən Sumqayıta 595 nömrəli ekspres avtobuslar fəaliyyət göstərir.
Nəqliyyat məsələləri üzrə ekspert Yasin Mustafayev “Sherg.az”a bildirib ki, ekspres avtobusların faydası çoxdur:
“Adından da göründüyü kimi ekspresdir. Yəni gediş-gəliş zamanı hər dayanacaqda dayanmayacaq və insanlar vaxt itirməyəcəklər. Ümumiyyətlə öncəki marşrutlar hər dayanacaqda dayandığı üçün vaxt çox gedirdi. Yeni avtobusların nə qədər effektiv olduğunu isə zaman göstərəcək. Ancaq indidən proqnozlaşdırmaq olar ki, effekti çox olacaq. Digər tərəfdən şəhərin bir neçə istiqamətində də bu addımlar planlaşdırılır. Çünki ekspres marşrutlar dövrün tələbidir. Biz tıxacı aradan qaldırmaq və insanların rahatlığı üçün hər bir addıma əl atmalıyıq. Bu konteksdə ekspres marşrutların yaradılması xeyli yüngüllük yaradacaq. Həmçinin avtobus zolaqları çəkildiyinə görə də insanlar rahatlaşıb. Düzdür, bəzi yerlərdə zolaqlar tam deyil, bəzi yerlərdə kəsilir, bəzi yerlərdə isə digər nəqliyyat vasitələri avtobusların yoluna çıxır. Lakin həm avtobus zolağı, həm də yeni marşrutlar vətəndaşları rahat şəkildə gedəcəkləri ünvana vaxtında çatdırmağa müvəffəq olacaq”.
