İsrailin baş naziri Benyamin Netanyahu hakim koalisiyanın parçalanmasının qarşısını almaq üçün ifrat sağçı tərəfdaşlarına Qəzza zolağında müharibənin yenidən başlaya biləcəyinə söz verib.
APA xəbər verir ki, bu barədə “Washington Post“ (WP) qəzeti mənbələrə istinadən məlumat yayıb.
“Bağlı qapılar arxasında Netanyahu ifrat sağçı müttəfiqlərinə müharibənin ilk, 42 günlük atəşkəs mərhələsindən sonra yenidən başlaya biləcəyini vəd edir”, – qəzet qeyd edir.
HƏMAS-la Qəzza zolağında atəşkəs razılaşması barədə xəbərlərdən sonra Netanyahu əsas müttəfiqləri olan maliyyə naziri Bezalel Smotriç və milli təhlükəsizlik naziri İtamar Ben-Qvirin kəskin tənqidi ilə üzləşib və onlar istefa verməklə hökuməti hədələyiblər.
Qeyd edək ki, İsrail və HƏMAS ilkin mərhələdə 42 günlük atəşkəs barədə razılığa gəliblər. Müqavilə yanvarın 19-dan qüvvəyə minəcək. Tərəflər girovların azad edilməsi ilə bağlı da razılığa gəliblər.
İsrailin 2023-cü il oktyabrın 8-dən sonra həbsdə olan 1000 Qəzza məhbusunu azad edəcəyi gözlənilir.
