Türkiyə Milli Kəşfiyyat Təşkilatının (MİT) direktoru İbrahim Kalın Benqazidə ölkənin şərqində yerləşən Liviya Milli Ordusunun baş komandanı general Xəlifə Haftarla görüşüb.
Teleqraf xəbər verir ki, bu barədə Türkiyə KİV məlumat yayıb.
Məsələ ilə əlaqədar Türkiyə Müdafiə Nazirliyinin yaydığı məlumatda deyilir:
“TCG Kınalıada”nın (gəmi) Benqazi limanına səfəri çərçivəsində Türkiyə və Liviya hərbi heyətləri arasında görüş keçirilib. General-mayor İlkay Altındağın başçılıq etdiyi Müdafiə Nazirliyinin nümayəndə heyəti Liviya Milli Ordusu komandanının müavini və Quru Qoşunlarının komandanı general Səddam Həftarı ziyarət edib.
Səfər zamanı “Vahid Liviya, Vahid Ordu” hədəfi çərçivəsində birgə səylərin müzakirəsi üçün görüşlər keçirilib. Görüşlərdə Liviya səfiri Güven Begeç və Benqazi baş konsulu Serkan Kıramanlıoğlu da iştirak edib. General Səddam Haftar Benqazidəki “TCG Kınalıada”ya da baş çəkib.
Milli Kəşfiyyat Təşkilatının direktoru İbrahim Kalın Benqaziyə səfərində Xəlifə Haftarla görüşüb”.
