Milli Məclisdə maraqlı təklif səslənib. Deputat Rəşad Mahmudov Novruz bayramı ilə bağlı təklif irəli sürüb. “Təklif edirəm ki, Novruz bayramında azərbaycanlılar koronavirusa görə eyni anda şamlar yandırıb eyvana çıxsınlar”.
"Sherg.az"ın məlumatına görə, millət vəkili bunun ümummilli məsələlərdə vətəndaşlarımızın həmrəyliyinin təsdiqi olacağını deyib.
R.Mahmudovun təklifində əslində, qeyri-adi nəsə yoxdur. Vətəndaş həmrəyliyinin nümayişini bayram günləri, xüsusilə Bayraq günündə, Aprel döyüşləri zamanı, Azərbaycanımız beynəlxalq yarışlarda qalib olduğu günlərdə müşahidə etmişik. Bakı sakinləri həmin günlərdə kimin eyvanı varsa, eyvandan, eyvanı olmayan pəncərədən, yaxud iş yerlərində, ofislərdə dövlər bayrağımızı dalğalandırırdılar. Belə bir ənənə demək olar ki, artıq formalaşıb. Və indi əgər millət vəkili əziz gündə - Novruz bayramı axşamı vətəndaşlara həmrəylik nümayişi məqsədilə eyvanlarda şamların yandırmalarını təklif edirsə, təəccüblü qarşılanmamalıdır. Paytaxt eyvanlarında eyni saatlarda, kütləvi şəkildə şamların yanması, həqiqətən çox gözəl və füsunkar görünə bilər.
Bəs, ictimaiyyət nümayəndələri nə düşünür?
Sosioloq Lalə Mehralı “Şərq”ə açıqlamasında mənzilinin küləkli ərazidə olduğunu xatırlatdı, lakin təşəbbüsü müsbət qarşıladığını dedi:
- Vallah, yaşadığımız ərazidə külək bizə elə divan tutur ki, şam nədir, bayram lampası da yandırsaq, o dəqiqə sönəcək. Amma R.Mahmudovun təklifi müsbətdir. Onsuz da bayram xonçasında hamı şam yandırır. Kimin imkanı varsa, şam yandırıb eyvana çıxsın, bu, həqiqətən də pozitivlik gətirər, odun enerjisi təmizləyər üstümüzdəki pessimistliyi.
“Təmiz Dünya” Qadınlara Yardım Birliyinin sədri Mehriban Zeynalova da bu fikirdədir ki, Novruz bayramı günlərində həmrəylik nümayiş etdirmək əsasdır:
- Biz bu gözəl bayramımızın bütün rəmzlərindən istifadə etməliyik. Xonça da bəzədilməlidir, səməni göyərdilməlidir. Niyə təkcə şam? İmkan varsa, qoy eyvanlarda xonçalar da olsun, səmənilər düzülsün. Şam da yandırılsın. Əziz günlərdə xalqımız həmrəylik nümayiş eütdirməyi bacarır. Bayram günlərində xüsusilə yaşlı insanlar, kimsəsizlər və uşaqları sevindirməliyik. Bayram axşamı uşaqları sevindirmək, ehtiyacı olanlara bayram sovqatı aparmaq ən böyük həmrəylik nümayişidir.
Məlahət Rzayeva
