Azərbaycanda su və kanalizasiya şəbəkəsinə qoşulma üzrə tarifləri Tarif Şurası müəyyən edəcək.
Dövlət Su Ehtiyatları Agentliyindən “APA-Economics”in sorğusuna cavab olaraq verilən məlumata görə, bu, Dünya Bankı Qrupunun “Business Ready” layihәsinin “Kommunal xidmətlər “Su şəbəkəsinə” qoşulma” indikatoru ilə bağlı müvafiq sahədə təkmilləşmələrin həyata keçirilməsinə dair 2024-cü il üzrə Yol Xəritəsində qeyd edilib.
Bildirilib ki, Azərbaycanda Prezidentin 1 may 2024-cü il tarixli müvafiq fərmanı ilə “Su təchizatı və tullantı suları haqqında” Qanununda dəyişikliklərin qüvvəyə minməsi ilə su şəbəkəsinə qoşulma üzrə mühüm iqtisadi islahatın aparılması bu sahədə yeni inkişaf mərhələsinin başlanılmasına və biznes mühitinin əlverişliliyinin daha da artırılmasına böyük imkanlar yaradıb. Yeni islahat nəticəsində qanunvericiliyin tələblərinə əsasən, su şəbəkəsinə qoşulma üzrə prosedurların sayı 13-dən 3-ə, qoşulma müddəti 60 gündən 30 günə endirilib, qoşulma xərcləri sahəsində şəffaf və aydın tənzimləmə mexanizmi ilə bağlı normativ hüquqi baza yaradılıb. Agentliyin rəhbərlik etdiyi “Su şəbəkələrinə qoşulma” işçi qrupunun aidiyyəti dövlət qurumlarının nümayəndələri ilə birlikdə son iki il ərzində intensiv və səmərəli fəaliyyəti nəticəsində müvafiq Yol Xəritəsi uğurla icra olunub, yeni iqtisadi təşəbbüslərin hazırlanması, xüsusilə qanunvericiliyinin daha da təkmilləşdirilməsi və asanlaşdırılması istiqamətində kompleks təkliflərin aidiyyəti üzrə təqdim olunması təmin olunub.
Agentlikdə su təchizatı və kanalizasiya sistemlərinə qoşulma üçün Vahid Pəncərə sistemi yaradılıb. Eyni zamanda su şəbəkəsinə qoşulma ilə bağlı xidmət keyfiyyəti üzrə standartların hazırlanaraq qəbulu və tətbiqi, yeni elektron xidmətin formallaşdırılması, məlumatların əlçatanlığının təmin olunması, müasir idarəetmə əsasında aidiyyəti dövlət qurumları ilə inteqrasiya qurulub.
Yeniliyi dəyərləndirən iqtisadçı ekspert, Natiq Cəfərli "Sherg.az"a deyib ki, Azərbaycanda Azərsu Açıq Səhmdar Cəmiyyətinin yeni obyektlər açılarkən texniki şərti vermə kimi səlahiyyəti var:
"Bütün obyektlərin açılmasında texniki şərt mühüm amildir. Ancaq əvvəllər texniki şərtin alınması xeyli dərəcədə çətinləşdirilmiş prosseslərdən ibarət idi. Tarif şurasının son qərarından sonra isə həmin mərhələnin sadələşdiyini görürük. Bu da yeni biznes sahələrinin yaradılmasımda su və kanalizasiya sistemdən istifadə edərək bura qoşulmaq üçün texniki şərtlərin alınmasını asanlaşdıracaq. Təbii ki, texniki şərt daha rahat və tez alınacaqsa, kiçik, orta sahibkarlar üçün müəyyən üstünlük yaradacaq".
