Göygöl rayonunun bir sıra kəndləri ayı hücumuna məruz qalıb.
Göygöl rayonu Toğanalı kəndində ayı insanların yaşadığı evlərin həyətinə daxil olub.
Toğanalı kəndinə istirahətə gedən Rövşən Əmiraslanoğlu gecə saatlarında həyətdə səs eşitdiyini bildirib. O, həyətə çıxan zaman ayının çəpəri dağıdaraq həyətə daxil olduğunu görüb.
"Mən təxminən 4-5 metr ondan aralıda idim. Əl fənərinin işığını ayıya tərəf tutdum. Xoşbəxtlikdən ayı mənə hücum etmədi. Haradasa, on saniyədən çox ayı işığa doğru baxdı və sonra qonşunun həyətinə tərəfə qaçdı”.
Qeyd edək ki, bir neçə ay öncə Göygöl rayonun digər kəndlərində də ayı sakinlərin təsərrüfatına hücum edib. Sakinlər ac ayının onlara xəsarət yetirəcəyindən ehtiyat edirlər.
Məsələni dəyərləndirən Ümumdünya Təbiəti Mühafizə Fondunun Azərbaycan nümayəndəliyinin direktoru Elşad Əsgərov “Sherg.az”a bildirib ki, ayılar tək meşə yox, həm də dağ heyvanıdır:
“İnsan məskənləri və təsərrüfatı genişləndikcə vəhşi təbiət daraldılaraq heyvanların yaşayış yerləri parçalanır. Bu bütün dünyada gedən prossesdir. İnsanlar məişət tullantılarını açıq ərazilərə atır. Bu isə yırtıcı heyvanları cəlb edir. Avropada, hətta Türkiyədə belə zibilliklərə kamera qurub baxırlar ki, ayılar həmin yerlərə gələrək özlərinə qida axtarırlar. Rahat əldə edilən qida və məişət tullantıları ayıları həmin yerlərə cəlb edir. Yırtıcı heyvanlar da kəndə gələrək insanlarla qarşılaşırlar. Ayı ilə rastlaşdıqda, qaçmaq lazım deyil. Çünki onun sürəti saatda 50-60 km dir. Ən surətli insan belə qaçıb canını qurtara bilməz. Adətən meşəyə gedən adamlar özü ilə pirotexniki vasitələr aparır. Bu ayıdan qurtulmaq üçün yaxşı vasitədir. Ayını görəndə gözünün içinə baxmamaq və panikaya düşməmək lazımdır. Gözünü ayıdan çəkmədən yavaş yavaş uzaqlaşmaq məsləhət görülür. İnsana ən çox yaralı və ya balası olan ayı hücum edir. Ümumiyyətlə vəhşi heyvanları cəlb etməmək üçün kəndlərin ətrafında zibilliklər yaratmamaq, məişət tullantılarını vaxtında outilizasiya etmək lazımdır”.
