Gürcüstan Baş naziri İrakli Kobaxidze müxalifət partiyalarını çox gec olmadan 4 oktyabrda hökuməti devirmək planından əl çəkməyə çağırıb.
Teleqraf xəbər verir ki, o, opponentlərini cinayət təqibi ilə hədələyib.
“Hər kəsə xəbərdarlıq edirəm: istənilən zorakılığa ən sərt hüquqi cavab veriləcək. Bütün siyasi partiyaları və digər birlikləri hələ vaxt varkən, məqsədi hökumətin zorakılıqla devrilməsi və ya konstitusiya quruluşunun dəyişdirilməsi olan proseslərdən uzaqlaşmağa çağırırıq”, - Kobaxidze bildirib.
Baş nazir xatırladıb ki, etirazçılar 2024-cü ildə nümayişlər zamanı zorakılığa görə iki ildən dörd il yarımadək həbs cəzası alıblar: “Amma bu dəfə zorakılıq baş verərsə, cəza daha sərt ola bilər”.
Kobaxidze həmçinin vurğulayıb ki, mitinq təşkilatçıları hakimiyyətə sürpriz vəd etsələr, onları daha böyük sürpriz gözləyir.
Oktyabrın 4-də Gürcüstanda yerli hakimiyyət orqanlarına seçkilər keçiriləcək. Müxalifət həmin gün hakimiyyəti dinc yolla devirmək məqsədi ilə kütləvi etiraz aksiyası təşkil etməyi planlaşdırır. Vahid Milli Hərəkat Partiyasının keçmiş rəhbəri Levan Xabeişvili və eyni partiyadan olan Tbilisi Şəhər Şurasının üzvü Zviad Kuprava daha əvvəl hökumətin devrilməsinə çağırışlara görə həbs edilib.
