Ermənistanın birinci prezidenti Levon Ter-Petrosyan bütün ermənilərin katolikosu II Qaregini şəxsi iqamətgahında qəbul edib.
Teleqraf xəbər verir ki, bu barədə sabiq prezidentin mətbuat katibi Arman Musinyan məlumat verib.
“Bir saata yaxın davam edən söhbət zamanı Ermənistandakı mövcud vəziyyət qiymətləndirilib, Baş nazir Nikol Paşinyanın kilsəyə qarşı elan etdiyi müharibə kontekstində məsələlər müzakirə olunub.
Birinci prezident görüşdə Paşinyanı “məğlubiyyətin təcəssümü” adlandırıb və qeyd edib ki, o, Qarabağ müharibəsində biabırçı şəkildə uduzub və erməni kilsəsinə qarşı elan etdiyi müharibədə də uduzacaq”, - Musinyan bildirib.
Levon-Ter Petrosyan görüşdə Nikol Paşinyana qarşı II Qareginə dəstəyini bəyan edib.
Xatırladaq ki, bundan əvvəl Ermənistan Baş naziri Nikol Paşinyan bütün ermənilərin katolikosu II Qaregini subaylıq andını pozmaqda ittiham edib. Paşinyanın sözlərinə görə, subaylıq andını pozaraq övlad sahibi olan Qaregin artıq Erməni Apostol Kilsəsinin rəhbəri ola bilməz. Həmçinin o, katolikosu Ermənistan dövlətinin maraqlarına qarşı fəaliyyətlərdə günahlandırıb.
Ermənistan hökumətinin başçısı Erməni Apostol Kilsəsinə yeni katolikosun seçilməsi üçün seçkilərə və bu məqsədlə koordinasiya şurasının yaradılmasına çağırıb.
