Hərbi büdcənin 800 milyon dolları Ukraynanın təhlükəsizliyinə xərclənəcək
Gələn il təkcə Amerikanın Avropadakı hərbi varlığına 6 milyard dollar ayrılacaq
ABŞ Konqresi 2023-ci il üçün hərbi büdcəni razılaşdırıb. Konqresin hərbi büdcəsi Nümayəndələr Palatası ilə Senatın komissiyalarında qızğın müzakirələrdən keçib. Amerika 2023-cü ildə hərbi məqsədlər üçün 858 milyard dollar xərcləyəcək. Bu, astronomik məbləğdir. Amerikanın builki hərbi büdcəsi 778 milyard dollar civarında idi. Hərbi büdcə imzalanması üçün Prezident Co Baydenə göndərilib.
Politoloq Elxan Şahinoğlu deyib ki, Ukrayna müharibəsi və Rusiyanı dayandırmaq baxımından Amerikanın gələn il üçün hərbi xərclərinin artırılması nəzərdə tutulub. Ekspert vurğulayıb ki, hərbi büdcənin 800 milyon dolları Ukraynanın təhlükəsizliyinə xərclənəcək: "Əvvəlki büdcədə 500 milyon dollar nəzərdə tutulmuşdu, 300 milyon dollar əlavə edilib. Amerikanın Avropadakı hərbi varlığına 6 milyard dollar ayrılacaq. Bu, əvvəlki büdcə layihəsindən 2 milyard dollar artıqdır.
Konqres Qərb ölkələrinin Rusiyadan enerji asılılığını azaltmaq, sanksiyaların artırılması və Rusiyanı “böyük iyirmilərdən” çıxarması yolları üzərində də düşünür. Kreml Konqresin gərginliyi artıran sənədini tənqid edib. Yeni hərbi büdcəyə görə texnoloji xərclər artırılacaq, yeni təyyarələr və gəmilər üzərində çalışmalar davam edəcək. Yeni nəsil bombardmançı təyyarələr istehsal ediləcək. ABŞ müdafiə naziri Loyd Ostin “B-21 Raider” tipli təyyarə istehsalını tarixi hadisə adlandırıb. Bu təyyarələr dünyanın istənilən nöqtəsinə adi və nüvə başlıqlı raketlər daşımaq imkanına malikdirlər. Digər tərəfdən yeni təyyarələr “Stels” texnologiyası kimi hava hücumundan müdafiə sistemlərinin radarlarına düşmür".
E.Şahinoğlu bildirib ki, ABŞ hərbi büdcəsinin artımı yalnız Rusiyanın işğalçı siyasəti ilə bağlı deyil: "Vaşinqton Çini də durdurmaq istəyir. ABŞ Hind-Sakit okean bölgəsindəki xərclərini 11 milyard 500 milyon dollar civarında planlaşdırıb. Bu həm Çini durdurmaq, həm də Amerikanın bölgədəki müttəfiqlərinə dəstək üçün nəzərdə tutulub. Bu çərçivədə Amerika Tayvanın təhlükəsizliyinin gücləndirilməsi üçün 5 ildə 10 milyard dollar xərcləyəcək".
