ABŞ Prezidenti Co Bayden ukraynalı həmkarı Vladimir Zelenskidən üzr istəyib.
Parisdə keçirilən görüş zamanı Prezident Co Bayden ilk dəfə olaraq Ukrayna Prezidenti Vladimir Zelenskidən Rusiyanın döyüş meydanında irəliləyişinə imkan verən ABŞ hərbi yardımını aylarla gecikdirdiyinə görə açıq şəkildə üzr istəyib.
Bayden vurğulayıb ki, ABŞ uzun müddət Ukraynanın yanındadır.
“Biz hələ də yanınızdayıq. Tamamilə. Hərtərəfli", - o deyib.
Baydenin Ukraynadan üzrxahlığına münasibət bildirən "Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli "Sherg.az"a vurğulayıb ki, Amerikanın Ukraynaya silahları verməyi aylarla gecikdirməsi rəsmi Kiyevə on minlərlər canlı qüvvə itkisi hesabına başa gəlib:
“Ukraynanın canlı qüvvə və savaş meydanında mövqe itkilərini ABŞ Prezidentinin üzürü ilə kompensasiya etmək mümkün deyil. Ukrayna bu müddət ərzində hücum taktikasından müdafiə üsuluna keçib. İndi Ukrayna qalib gəlmə şansı olduğu halda məğlubiyyət təhlükəsiylə üzləşib. Bu itkilər isə strateji sayılır. Əgər Ukrayna yenidən hücum taktikasına keçsə, Amerikanın günahı ucbatından itirdikləri əraziləri geri qaytarmaq üçün canlı qüvvə itkisi vermək məcburiyyətində qalacaq. Amerika Ukraynaya qarşı bundan sonrakı davranışlarında daha səmimi və prinsipial olmalıdır. Yəni Ukrayna ordusunun silah-sursatla təmin edilməsində ləngimələrə yol verməməlidir. Əks halda Ukrayna dövlətinin mövcudluğu təhlükə altında qala bilər. Amerika Prezidentin Ukraynanın yanında olması ilə bağlı verdiyi təminat inandırıcı deyil. ABŞ Prezidentini üzrxahlıq məcburiyyətində qoyan səbəblər göstərir ki, Amerika Ukraynaya münasibətdə yenidən eyni davranışı sərgiləyə bilər. Yəni növbəti Ukraynaya silah-sursatla təminatında ləngimələrin olmamasına heç kim təminat verə bilməz. Kiyevə verilən vədlərin yerinə yetirilməməsi Ukraynada ciddi narazılıqlar yaradıb. Ona görə də Co Bayden üzrxahlıq etməklə qeyri-ciddi davranışların üzərini örtməyə çalışır. Eyni zamanda Baydenin çıxışı Ukrayna cəmiyyətinin Amerikaya münasibətini yenidən müsbətə doğru dəyişmək niyyəti güdür”.
