Co Bayden administrasiyasının Ukraynanın maraqlarına sadiqliyi və davamlı dəstəyi dəyişməz olaraq qalır və Birləşmiş Ştatlar ukraynalıların ərazi itkilərini qəbul etmək şərti ilə Ukrayna hakimiyyətini Moskva ilə danışıqlara məcbur etmək niyyətində deyil.
Bu barədə Ağ Evin milli təhlükəsizlik məsələləri üzrə koordinatoru Con Kirbi Trampın Ukrayna müharibəsi ilə bağlı planının olmasını şərh edərkən deyib.
“Prezident Baydenin Ukraynanı dəstəkləmək öhdəliyi həmişə sabit, güclü və ardıcıl olub. Biz Ukraynanı dəstəkləyən 50-dən çox ölkədən ibarət qlobal koalisiya yaratdıq. Və prezident başa düşür ki, Ukraynanın döyüş meydanında mövqeyi nə qədər yaxşı olarsa, vaxtı gələndə danışıqlar masası arxasında ukraynalıların mövqeyi bir o qədər güclü olacaq. Və bilirsiniz ki, bu vaxt gələndə kim qərar verir - Prezident Zelenski. Və başqa heç kim”.
Con Kirbinin fikirlərinə münasibət bildirən politoloq Sultan Zahidov “Sherg.az”a vurğulayıb ki, Bayden administrasiyasının mövqeyi əvvəldən indiyə qədər Rusiyanın Avropa üçün böyük təhdid olmasından ibarətdir:
“Əgər Rusiya Ukraynada qalib gələrsə, Avropa və Amerikanın maraqlarını təhlükə altına alacaq. Çünki Avropanın əksər ölkələri NATO üzvləridir. Ona görə də Ukraynaya dəstək Bayden administrasiyasında əsas mövqelərdəndir. Bu günə kimi də ABŞ administrasiyası hər vəchlə sözügedən dəstəyi davam etdirmək niyyətini büruzə verib. Ən son ABŞ Senatının Ukraynaya 61 milyard dollarlıq yardım paketinin ayrılması bir daha göstərir ki, demokratlar rəsmi Kiyevin müharibədə əsas dəstəkçisidir. Noyabrda keçirilən prezident seçkilərində Donald Trumpın qalib gəlmə ehtimalı böyükdür. Əgər Trump qalib gələrsə, onun Ukrayna siyasəti fərqli olacaq. Belə olan halda ABŞ-nin əvvəlki kimi dəstəyi olmadan Rusiyanın Ukraynadan daha çox dividentlər götürmək şansı artacaq. Hazırda döyüş cəbhəsində böyük dəyişiklik yoxdur. Hər iki tərəf ABŞ-də keçiriləcək prezident seçkilərinin nəticələrini gözləyir. Sözügedən nəticələrə görə tərəflər müvafiq strategiyalarını işə salacaqlar. İndiki halda Bayden administrasiyasının əsas hədəfi növbəti dəfə seçkilərdə qalib gəlməkdir. Bu baş tutsa, Ukrayna savaşının uzanma ehtimalı daha böyükdür. Çünki heç bir tərəf kompromisə getmək istəmir. Amma Trump seçilib, Ukraynaya yardım göstərməyəcəksə, atəşkəsin imzalanması mümkündür. Ona görə ki, Amerikanın ciddi dəstəyi olmadan Ukraynanın müharibədə divident əldə etməsi mistik görsənir".
Qeyd edək ki, “Röyters” bu həftə keçmiş prezident Donald Trampın komandasına yaxın mənbələrə istinadən xəbər verib ki, iki yaxın müşaviri Trampa Ukraynada müharibəyə son qoymaq planını təqdim ediblər. Plan Ukraynanın şərqində Rusiya hakimiyyəti tərəfindən indi ələ keçirilən ərazilərin itirilməsinə razılıq verməsini nəzərdə tutur.
