Tiflisdə yenidən hökumət əleyhinə aksiya başlayıb. Parlament binası qarşısına yüzlərlə etirazçı toplaşıb, Rustaveli prospekti bağlanıb.
Ərazidə polis qüvvələri asayişi qoruyur. Hər hansı insident qeydə alınmayıb.
Qeyd edək ki, 28 noyabrda Gürcüstan Baş naziri İrakli Kobaxidze ölkəsinin AB-yə üzvlük danışıqlarını 2028-ci ilə qədər dayandırdığını elan etdikdən sonra Tiflisdə aksiyalar sistemli olaraq keçirilir.
Orta Doğu Araşdırmalar Mərkəzinin sədri, politoloq Sədrəddin Soltan “Sherg.az”a söyləyib ki, Gürcüstandakı hadisələr Qərb blokunu, xüsusilə Amerika Birləşmiş Ştatları və Avropa İttifaqını narahat edir:
“Çünki Gürcüstan həmin blokun Cənubi Qafqazda ən etibarlı tərəfdaşı sayılırdı. Hətta iddialar var idi ki, Gürcüstan indiki əraziləriylə NATO və Avropa İttifaqına üzvlüyə çox yaxındır. Amma baş verən son hadisələr ABŞ, Avropa İttifaqı və NATO-nun Gürcüstana münasibətində müəyyən dəyişiklik etməsinə səbəb oldu. ABŞ və Böyük Britaniya Gürcüstanla bir sıra istiqamətlərdə əməkdaşlığı dayandırıb. Avropa İttifaqı isə Gürcüstanla əlaqələrinə yenidən baxacağı formasında açıqlamalar verib. Bəzi məlumatlarla görə Gürcüstan 2028-ci ilə qədər Aİ-lə əməkdaşlığı dayandıracaq. Ölkədə baş verən müxalifətin etiraz aksiyası da hökümətin tutacağı sözügedən addıma qarşıdır. Bir müddət öncə Gürcüstanın Baş naziri İrakli Kobaxidze açıqlama verdi ki, Gürcüstan hökümətinin Avropa İttifaqıyla əməkdaşlığı dayandırmaq fikri və niyyəti yoxdur və yayılan məlumatları dezinformasiya adlandırdı”.
Ekspert qeyd edib ki, Avropa İttifaqına üzv ölkələrin xarici işlər nazirləri ABŞ, Böyük Britaniya və NATO-nun Gürcüstana münasibətindən daha yumşaq yol almaqla bağlı qərar qəbul edəcəklər:
“Onlar daha çox vəziyyətin sakitləşməsini gözləməklə bağlı qərar qəbul edə bilərlər. Çünki Avropa İttifaqında olan bəzi rəsmilər ABŞ-nin Gürcüstana qarşı radikal münasibətini tənqid etmişdi. Ona görə də Avropa İttifaqı Gürcüstanın yeni hökümətiylə dil tapmaq üçün müəyyən qərarlar qəbul etməli olacaq. Bu Gürcüstan höküməti və Avropa üçün regional marağının təmin olunmasına müəyyən üstünlük verə bilər. Çünki Gürcüstanla münasitləri tamamilə kəsmək rəsmi Tiflisin yönünü dəyişmək olar”.
