Fələstin Milli Administrasiyası Qəzza zolağına nəzarəti bərpa etməlidir.
Bunu Misir Prezidenti Əbdülfəttah Sisi deyib.
Sisi qeyd edib ki, Misir Fələstin hakimiyyəti ilə birlikdə Qəzzanın idarə olunması üçün xüsusi inzibati komitə yaradıb. Bu komitəyə yalnız lazımi peşəkar səlahiyyətlərə malik müstəqil mütəxəssislər daxil olacaq.
Politoloq Zeynal Əmrəliyev “Sherg.az”a söyləyib ki, Fələstin Milli Administrasiyasının Qəzza zolağına nəzarəti bərpa etməsi üçün Misir çox çalışıb:
“Artıq Həmas da bununla razılaşıb. Mahmud Abbasın rəhbərlik etdiyi Əl Fəth qruplaşması və Həmas arasında razılıq müqaviləsi imzalanıb, bununla da Qəzza bölgəsinə nəzarət Fələstin Administrasiyasına həvalə olunmalıdır. Həmas bu müqaviləyə Qəzza bölgəsində olan polislərə toxunulmaması şərtiylə razılaşıb. Buna baxmayaraq İsrail yenə də prosesə maneə olmağa çalışır. Amerikanın prezidenti Donald Tramp bəyan edib ki, Qəzza bölgəsi ümumən sökülməli və insanlar oradan köçürülməlidir. Söhbət burada həmin bölgədən fələstinlilərin çıxarılaraq yəmənlilərin yerləşdirilməsindən gedir. Amerika Qəzzanı İsrailə birləşdirmək istəyir. Bu şübhəsiz ki, ikili dövlət layihəsinin tamamilə sıradan çıxarılması hesablanan addımdır. Misir isə buna alternativ təqdim etmək niyyətindədir. Çünki köçürülən fələstinlilər Misir və İordaniya ərazisində yerləşdiriləcək. Misir isə bununla razılaşmaq niyyətində deyil. Böyük ehtimalla Misirin nəzarətiylə Qəzza bölgəsinin Fələstin Milli Administrasiyasına birləşdirilməsi həyata keçiriləcək. Əks halda İsrail həmin bölgədə hərbi əməliyyatlara başlayacaq və Amerikanın öz mənfur planlarını yerinə yetirməsi üçün şərait yaranacaq”.
