İranın Çabahar limanında Rusiya, İran və Çinin hərbi dəniz qüvvələrinin “Dəniz təhlükəsizlik kəməri 2025” təlimləri başlayıb.
Bu barədə Rusiya Müdafiə Nazirliyi məlumat yayıb.
Bildirilib ki, yaxın günlərdə ekipajlar Hind okeanının şimal hissəsində əsir götürülmüş gəmilərin azad edilməsi, dənizdə axtarış və xilasetmə, həmçinin dənizdə və hava hədəflərində artilleriya atəşi həyata keçirmək üçün tapşırıqları yerinə yetirəcəklər.
Rusiya MN-dən o da bildirilib ki, təlimlərin məqsədi dəniz təhlükəsizliyini təmin etmək, dənizdə piratçılıq və terrorizmlə mübarizə, dəniz kommunikasiyalarının qorunmasıdır.
ABŞ Prezidenti Donald Tramp İran, Rusiya və Çin arasında Çabahar limanında keçiriləcək dəniz təlimindən narahat olub-olmaması ilə bağlı suala cavabında "Xeyr, heç vaxt!" deyib:
"Xeyr, heç vaxt! Çünki biz onların hamısından güclüyük. Mən Amerikanı və ordunu yenidən qurdum. Təəssüf ki, Bayden heç nə etmədi".
Politoloq Elxan Şahinoğlu "Sherg.az"a deyib ki, Donald Tramp Prezident seçiləndən sonra bir çox fikirləri təkrarən bildirir:
"ABŞ Prezidenti "Bayden bunları yanlış etdi", "Mən Prezident olsaydım, Rusiya-Ukrayna müharibəsi başlamayacaqdı" və digər bu kimi mülahizələri dəfələrlə söyləyir. Bu gün Tramp Çabahar liman və ona yaxınlaşan tankerlərə sanksiyaları sərtləşdirməyə çalışır. Əslində ABŞ Prezidentinin əsas hədəfi Çindir. O istəyir ki, Rusiya-Çin ittifaqı zəifləsin. Lakin çətin ki Tramp buna nail olsun. Çünki İran, Rusiya və Çinin birgə təlimləri ondan xəbər verir ki, Moskva və Pekin Trampın oyununa gəlməyəcəklər. Ağ Evin sahibi istəyir ki, Rusiya ilə yaxınlaşsın və əlaqələri bərpa etsin, o cümlədən Çini hədəf götürməklə yanaşı sözügedən ittifaqın da zəifləməsini gerçəkləşdirsin. Amma Kreml və Çin rəhbərliyi də bu oyundan xəbərdardır. Ona görə də birliklərinin sarsılmasına icazə verməyəcəklər".
