Bakıda keçirilən COP29 “Bakı sıçrayışı” kimi adlandırıldı və bu da orada qalan bir irsdir.
Bu sözləri Prezident İlham Əliyev XII Qlobal Bakı Forumunun açılış mərasimindəki çıxışında deyib.
“Əfsuslar olsun, deməliyəm ki, bu qlobal beynəlxalq tədbir bəzi Qərb medialarında kampaniyalarla müşayiət olundu”, - deyən dövlət başçısı bunun bir sıra mərkəzlərdən gördüyümüzü bildirib.
Bunlar arasında ABŞ-ın Dövlət Departamentinin, saxta xəbərlər yayan “Washington Post“, “New York Times“, “News Week”, “Politico”, “Associated Press“in, Fransanın Prezident ofisinin, “Le Figaro” və “Le Monde” qəzetlərinin olduğunu vurğulayıb.
Tanınmış jurnalist, “Globalinfo.az” saytının təsisçisi və baş direktoru Azər Ayxan “Sherg.az”a bildirib ki, Azərbaycana qarşı hər zaman Qərb mediasından qərəzli mövqelərin şahidi oluruq:
“Xüsusilə də 2020-ci ildə Azərbaycan işğal altındakı torpaqlarını ermənilərdən azad edəndən sonra bu qərəz başqa bir forma almağa başladı. Artıq Azərbaycan həm regionda, həm də dünyada sayılıb-seçilən bir dövlət formatına gəldiyi üçün, Ermənistan kimi kənar yerlərdən, xüsusilə də Qərb paytaxtlarından tapşırıqlar, direktivlər almadığı və müstəqil xarici siyasət yürütdüyü üçün dövlətimizə və Prezidentə qarşı Qərb mediası tərəfindən qarayaxma kampaniyaların tez tez şahidi oluruq. Bu isə yalnız o ölkələrdə fəaliyyət göstərən medianın, jurnalistlərin fəaliyyəti deyil. Bu, həmin dövlətlərin başında dayanan şəxslərin birbaşa tapşırığı və tövsiyəsi ilə həyata keçən məsələdir. Azərbaycan bu gün nəhəng, qlobal tədbirlərə ev sahibliyi edir. İndiyə qədər oxşar tədbirlər paytaxt Bakıda bir neçə dəfə keçirilib. Bunun ən, yadda qalanlarından biri də 2024-cü ilin noyabrında keçirilən COP29 sammiti idi. O ərəfədə və ondan sonrakı günlərdə də biz xarici mediada, xüsusilə də Qərb mediasının qərəzli münasibətinin şahidi olduq. Bütün bunlara baxmayaraq, Azərbaycan dövləti öz yolu ilə, əzmi ilə irəliləyir. Bu cür şantaj yanaşmalar, qeyri obyektiv yazılar Azərbaycan dövlətinin yolunu kəsə bilməyəcək”.
