Ona görə də bu toplantı tərəflərin xoş niyyət görüşməsidir
Rusiya ilə ABŞ arasında İstanbulda keçirilən görüş başa çatıb.
APA-nın İstanbul müxbirinin verdiyi xəbərə görə, yerli vaxtla saat 10:00-da başlayan görüş 5 saatdan çox davam edib.
Qeyd edək ki, görüş Rusiyanın İstanbuldakı Baş konsulluğunda keçirilib.
Danışıqlar qapalı formatda aparılıb.
Tanınmış jurnalist, politoloq Fuad Abbasov “Sherg.az”a bildirib ki, görüşün İstanbulda baş tutması çox əlamətdar bir hadisədir:
“28 Fevralda baş tutan və indiki İstanbul görüşündə hər iki tərəf öz mənfəətlərinə uyğun nəticə əldə etmək istəyirlər. Putin və Trampın biri-birinə yaxınlaşması Amerika-Rusiya qütblərinin birləşməsi mənasına gəlmir. İkinci Dünya savaşı bitdikdən sonra hələ də Amerika və Rusiya fərqli qütblərdə olan nüvə dövlətləri olaraq mübarizələrini davam etdirirlər. Eyni mübarizə üçün Vyetnam, Koreya, Əfqanıstan və Ukrayna poliqon olaraq istifadə olunub. Həmin müharibə qurtardıqdan sonra belə Amerika və Rusiyanın qarşıdurması bitməyəcək. Bunun olması üçün ya Amerika Rusiya kimi, yada Rusiya Amerika kimi dövlət halına gəlməlidir ki, bu da qeyri-mümkündür. Ona görə də Ukrayna müharibəsi bitib diplomatik əlaqələr bərpa olunsa belə, iki qütbün mübarizəsi Üçüncü Dünya savaşı yaranana qədər davam edəcək. Əgər Üçüncü Dünya müharibəsi baş tutsa, yer kürəsi məhv olacaq. Belə bir deyim mövcuddur ki, “Üçüncü Dünya savaşı olduqdan sonra Dördüncü Dünya müharibəsi daş-kəsək və taxta parçaları ilə aparılacaq”. Ona görə də bu toplantı tərəflərin xoş niyyət görüşməsidir”.
