“Çin və Azərbaycan İkinci Dünya müharibəsində Qələbənin əldə olunması naminə danılmaz tarixi töhfələr veriblər. Hər iki ölkə multilateralizmin, beynəlxalq bərabərliyin və ədalətin müdafiəsində əsas qüvvədir”.
APA xəbər verir ki, bu barədə Çinin Azərbaycandakı səfiri Lu Mey bugünkü brifinqdə bildirib.
Səfir qeyd edib ki, Azərbaycan tərəfindən yeni dərc olunmuş tarixi materialları oxuyaraq 40 mindən çox azərbaycanlının Uzaq Şərq və Zabaykalye cəbhələrinin tərkibində xidmət etdiyini və Yaponiyanın Kvantun ordusuna qarşı döyüşlərdə fəal iştirak etdiyini öyrənib: “Onlar Çinin Harbin, Şenyang və Çançun kimi mühüm şəhərləri uğrunda döyüşlərə əhəmiyyətli töhfə veriblər. Çin xalqı aqressiyaya qarşı apardığı mübarizədə Azərbaycan xalqının göstərdiyi dəstək və yardımı heç vaxt unutmayacaq”.
Səfirin sözlərinə görə, beynəlxalq vəziyyət nə qədər gərginləşirsə, bir o qədər Çinlə Azərbaycan həmrəylik və əməkdaşlığı gücləndirməli, dünyaya daha çox sabitlik və müsbət enerji gətirməlidir: “Çin Azərbaycanla birgə səylər göstərməyə, iki dövlət başçısı tərəfindən əldə olunmuş mühüm razılaşmaların həyata keçirilməsinə, tərəflər arasında qarşılıqlı faydalı əməkdaşlığa töhfə verməyə və daha böyük nəticələr əldə etməyə hazırdır. Çin beynəlxalq bərabərliyin və ədalətin müdafiəsinə, habelə dünya miqyasında sülh və inkişafa daha böyük Çin-Azərbaycan töhfəsi vermək niyyətindədir”.
