İsrail və Netanyahu da alət kimi istifadə edilərək, Yaxın Şərqi və dünyanı öz geopolitik maraqları çərçivəsində yenidən dizayna çalışır
"Tramp və Netanyahu Qəzza–Fələstin planını ortaya ataraq “iki dövlətli həll” ümidini, “dövlət qurmaq arzusunu” və “qanla əzabın dayanmasını" əldə etmək üçün silahdan istifadə niyyətindədirlər".
Bu sözləri Sherg.az-a açıqlamasında Bahçeşehir Universiteti Strateji Araşdırmalar Mərkəzinin rəhbəri, terror və təhlükəsizlik üzrə ekspert Abdullah Ağar bildirib.
O qeyd edib ki, Qəzzada indiyədək davam edən şiddət, qırğın, ölüm, dağıntı, aclıq, qıtlıq, yoxsulluq və qeyri-müəyyənlik vasitələri məqsədyönlü şəkildə irəli sürülüb:
"Bunlar həm Qəzza xalqına, həm də HƏMAS-a təzyiq göstərmək, eləcə də xalqı bu təşkilata qarşı bir təzyiq alətinə çevirmək üçün tətbiq olunub. Eyni zamanda beynəlxalq ictimaiyyəti və hədəf dövlətləri qorxutmaq, yönləndirmək və manipulyasiya etmək funksiyasını yerinə yetirib. İndi planın yeni və daha rafinə edilmiş bir tərəfi ortaya çıxır: “Ümidin, arzunun və ağrının sakitləşdirilməsi istəklərini” silaha çevirmək! Yəni “iki dövlətli həll vədi”, “dövlət qurmaq xəyalı”, “Qəzza-nın yenidən qurulması”, “ağrıları azaltmaq üçün humanitar paketlər” artıq prosesin idarə edilməsi, nəzarət və hədəf mexanizmi kimi işlədilir. Bu vədlər beynəlxalq ictimaiyyəti aldatmaq, hədəf xalqların ümidini söndürmək, vicdan reaksiyalarını yatışdırmaq və müqaviməti zəiflətmək üçün vasitəyə çevrilir. Bu, əslində hibrit müharibələrin gözardı edilən başqa bir üzüdür: Ümid və arzular manipulyasiya olunur. Maraqlıdır ki, Fələstin dövləti müəyyən yeni təriflərlə “vəd” sxemləri — “dövlət vədi”, “iki dövlətli həll”, “yenidənqurma”, “humanitar paket” kimi təqdim edilərək, artan qlobal vicdan enerjisini və qəzəbi yatışdırmaq, xarici ictimai dəstəyi parçalayıb dağıtmaq, dövlətlərin siyasət alqoritmlərini uyğunlaşdırmaq və ölkənin müqavimətini parçalamaq potensialına malikdir".
Ekspert əlavə edib ki, planın sərt alternativi daha qabarıqdır ki, bu halda HƏMAS böyük bir çıxılmaz vəziyyətin içinə sürüklənir:
"İstənilən nəticəyə razı salınması üçün ona ağır təzyiqlər göstəriləcək. Razılaşmasa, “sülhə maneə törədən aktor” kimi damğalanacaq. Üstəlik, bu diskurs yeni qırğınlar da daxil edilməklə növbəti addımları legitimləşdirmək üçün istifadə olunacaq. Ümumilikdə mənzərə aydındır: Bu plan ABŞ-nin, İsrailin və Netanyahunun maraq və istəkləri ilə uyğunlaşır. Hətta İsrail və Netanyahu da alət kimi istifadə edilərək, Yaxın Şərqi və dünyanı öz geopolitik maraqları çərçivəsində yenidən dizayna çalışır. Yeni əməliyyatlara meydan açmaq, sahədə yığıntıları formalaşdırmaq və strateji fürsətlərin inkişafına dəstək bu paketinin təbii davamıdır. Nəticə olaraq demək olar ki, İsrail və ABŞ bu fürsəti onlara təqdim edənlərə minnətdar olmalıdırlar".
