Şərq” qəzetinin baş redaktoru Akif Aşırlı "musavat.com"a açıqlamasında deyib ki, internet mediası yazılı mətbuatı qabaqlayıb:
“Dünyada qəzetlər daha cox media holdinqlərinin tərkibində fəaliyyət göstərir. Həmin holdinqlərin həm internet saytları, həm tv-ləri, həm də yutub kanalları var. Qəzet də onların timsalında klassik jurnalistika nümunəsi kimi fəaliyyət göstərir.
Türkiyədə əvvəllər “Hürriyet”, “Sabah” kimi qəzetlərin əlavələri çap olunurdu. İndi onlar da səhifələrin sayını azaldıblar. Qəzetçilik ona görə lazımdır ki, klassik media institutu qorunub saxlanılsın. 50-60 və ondan çox yaşı olan insanların əsas informasiya mənbəyi qəzetlərdir. Ancaq təəəsüf ki, bu hədəf qruplarına yönəlik siyasət həyata keçirsək də, yayım şəbəkələri buna imkan vermir. Demək olar ki, yayım şəbəkələri Azərbaycanda dağılmış vəziyyətdədir. Qəzet yayımı ilə məşğul olan şirkətlərin sayı durmadan azalır. Ancaq təyinatı üzrə qəzet satışı ilə məşğul olan şirkətlər də sadəcə qəzetin adından istifadə edib öz biznes strukturlarını qururlar. Bir ölkənin iqtisadi, siyasi, sosial həyatını ən gözəl əks etdirən qəzetlərdir. Biz 100 il əvvəlki hadisələri öyrənmək üçün qəzetlərə üz tuturuq. 50-70 il sonra da bizim Zəfər tariximizi yazacaq insanlar, tarixçilər qəzetlərə üz tutacaqlar. Çünki onlayn resurslarda bu məlumatların qalıb- qalmayacağı bəlli deyil.
Həm də klassik jurnalistikadan imtina gələcək jurnalistikanın "intiharı" deməkdir. Heç bir inkişaf etmiş dövlət kağız mətbuatından birdəfəlik imtina etmir. Azərbaycanda bu baş versə, çox ağır fəsadları ilə üz-üzə qalacağıq. Qəzetçilik ictimai institutdur, jurnalistlər redaksiyalarda formalaşır. Bünövrədən imtina etsək, nə ilə qarşılaşacağıq? Üç nəfərdən ibarət saytda hansı yaradıcılıq atmosferi formalaşacaq və yeni nəsil jurnalistləri yetişəçək? Nəzəri məsələlərlə məşğul olmaqla yanaşı praktik vəziyyəti bilmək və buna görə də addım atmaq lazımdır ”
