Görüşdə əsas müzakirə mövzusu Ukraynanın kapitulyasiyaya məcbur edilməsi idi
Rusiyanın Ukrayna böhranına yanaşması ilə bağlı Rusiya Prezidenti Vladimir Putin Şanxay Əməkdaşlıq Təşkilatının (ŞƏT) Dövlət Başçıları Şurasının iclasında bildirib ki, “heç bir ölkə öz təhlükəsizliyini başqasının hesabına təmin edə bilməz”.
O həmçinin vurğulayıb ki, ABŞ Prezidenti Donald Trampla Alyaskada keçirilən görüş zamanı əldə olunan anlaşmalar Ukraynada sülhə yol açır.
Politoloq Zeynəl Əmrəliyev Sherg.az-a Rusiya-Ukrayna münasibətlərindən danışıb:
" Trampla Alyaskada əldə olunan razılaşma Rusiyanın maraqlarına xidmət edir. Çünki bu razılaşma Ukraynada atəşkəsə nail olunmasına gətirib çıxarmadı. Alyaska görüşündə Vladimir Putinin əsas məqsədi məhz atəşkəsin baş tutmamasını təmin etmək idi. Rusiya hesab edir ki, əgər atəşkəs əldə olunarsa, Ukrayna gələcəkdə Qərbin dəstəyindən istifadə edərək Rusiyaya qarşı daha ciddi addımlar ata və işğal altında olan ərazilərini azad etmək üçün hərbi əməliyyatlara başlaya bilər.
Alyaska görüşü Putinin istədiyi kimi yekunlaşdı. Bununla yanaşı, Rusiya və Ukrayna arasında münasibətlərin normallaşması istiqamətində hər hansı əhəmiyyətli irəliləyiş müşahidə olunmadı. Görüşdə əsas müzakirə mövzusu Ukraynanın kapitulyasiyaya məcbur edilməsi idi. Hazırda Rusiyanın mövqeyi ondan ibarətdir ki, işğal altında olan ərazilər, həmçinin Donbas bölgəsinin də Moskvanın nəzarətində qalmasını təmin etsin. Bu isə olduqca təhlükəli bir yanaşmadır. Ukrayna bu tələbləri qəti şəkildə qəbul etmir".
Politoloq Putinin bu istiqamətdə irəli sürdüyü iddiaların əsassız olduğunu bildirib:
"Görüşdən sonra Rusiyanın Ukraynaya qarşı təzyiqləri daha da artdı. Rusiya Kiyevi açıq şəkildə bombardman etməklə öz aqressiyasını nümayiş etdirdi. Bu, tərəflər arasında münasibətlərin normallaşmasına deyil, əksinə, münaqişənin daha da dərinləşməsinə xidmət edir".
