Conson “Brexit”i həll edə biləcəkmi ? – AKTUAL ŞƏRH
“Boris Conson bir növ Tramp kimi xarakterizə edilən siyasətçidir. Amma dəqiq bir məsələ var ki, Britaniyada da siyasi sistem fərdləri idarə edir”.
Bunu “Sherg.az”a açıqlamasında beynəlxalq məsələlər üzrə siyasi şərhçi Əziz Əlibəyli deyib.
Ekspert bildirib ki, Conson da bu cür fərdlərdən biridir. Ayrıca, arxasındakı böyük siyasi qüdrətin diqtəsi onun hansı addım atacağına işarədir:
“Bu, heç də Consonun problemi deyil. Coğrafi mövqeyinə görə, İngiltərə siyasi seçimini tarix boyu dəqiqləşdirə bilmir. Ya Qitəyə inteqrasiya edir, ya da Atlantik istiqamətə. Sırf bu qərarsızlıq Britaniya siyasətinin əsasını təşkil edir. Daha bir maraqlı detal hakimiyyətdəki əsas rəqib cinahların - leyborist və mühafizəkarların baxışlarıdır. Hazırda “Brexit” kimi bir məsələnin həll edilməsi lazımdır. Bu problem iddiaya görə, Federativ idarəetməyə malik olan ölkəni parçalaya da bilər. Amma Conson kimi mühafizəkar bir şəxsin Baş nazir olması “Brexit”i həll edəcək kimi görünür. Avropa fəlakətə düçar olacaqsa, bu, Britaniyanın da o taleyi yaşaması anlamına gəlməyəcək. Şəxs olaraq, özününün ittiham edilməsinin səbəbi qaçqınlar, rasizm məsələsində tutduğu “trampvari” mövqedir”.
Qeyd edək ki, mühafizəkarlar partiyasının lideri və yeni baş nazir Boris Conson Kraliça II Elizabetin qəbulunda olduqdan sonra rəsmən Böyük Britaniyanın Baş Naziri elan edilib. Günlərdir dünya mediasında Böyük Britaniyanın yeni baş naziri Boris Consonun şəxsiyyəti və siyasi düşüncələri müzakirə olunur. Daha çox "ikinci Tramp" kimi təqdim edilən ingilis baş nazir konkret mövqeyi olmayan, düşüncələri paylaşılmayan və dəlisov bir fiqur kimi təqdim edilir. Nəinki Qərb ölkələrində, hətta İngiltərənin özündə də Consondan kifayət qədər narazı olanlar var.
