"Fransa Prezidenti Emmanuel Makron ABŞ-də keçiriləcək NATO sammitinə səfərindən imtina etmək məcburiyyətində qala bilər. Bu, Milli Assambleyaya (parlamentin aşağı palatasına) növbədənkənar seçkidən sonra yeni hökumətin formalaşdırılması ilə bağlı müxalifətin təzyiqi səbəbindən baş verə bilər".
Bu barədə "Le Figaro" qəzeti öz mənbələrinə istinadla xəbər verib.
"Solçular baş nazir namizədi barədə razılığa gəlməyə hazırlaşırlar, buna görə də biz təşkilatlanmalıyıq. Lakin əgər prezident iki günlüyə ABŞ-yə getsə, bizdə heç nə baş verməyəcək", - deyə istefa verən hökumətin üzvlərindən biri anonim olaraq bildirib.
O qeyd edib ki, yeni tərkibdə Milli Assambleyanın ilk iclasının planlaşdırıldığı 18 iyula qədər az vaxt qalıb, bəzi məsələləri isə iyulun 17-nə qədər razılaşdırmaq lazımdır.
"Gecikmə Milli Assambleyada əsas mövqelərin nəzərdən keçiriləcəyi hərtərəfli danışıqlara mane olur", - deyə nəşrin həmsöhbəti əlavə edib.
Bu fonda qəzet iddia edir ki, prezident həqiqətən də ABŞ-yə səfərini ləğv etməyin lazım olub-olmadığını düşünür.
Fransa liderinin ətrafındakılar qəzetin müvafiq sualına cavab olaraq bu ehtimalı rəsmən təkzib etməyiblər.
Bundan əlavə, hazırda Yelisey sarayı hələ də prezidentin ABŞ-yə qarşıdan gələn səfəri ilə bağlı yazılı qrafikini yaymayıb.
Mənbə: TASS
