Yəmənin “Ənsarallah” Hərəkatı (husilər) Qırmızı dənizdə İsrailə məxsus “Scarlet Ray” neft tankerinə raket zərbəsi endirib.
Bu barədə hərəkatın sözçüsü Yəhya Sariya məlumat verib.
Husilərin sözçüsü hədəfin uğurla vurulduğunu iddia edib.
“Yəmən donanması Qırmızı dənizin şimalında İsrailin neft tankeri “Scarlet Ray”ə ballistik raket hücumu həyata keçirib”, – Sariya bildirib.
Husilərin bu addımı, bölgədə gərginliyin artdığı bir vaxtda baş verib və İsrail tərəfindən tankerin vurulmasına qarşı hansı addımların atılacağı hələ açıqlanmayıb. Analitiklər hesab edir ki, bu əməliyyat Qırmızı dənizdə nəqliyyat təhlükəsizliyi və regional təhlükəsizlik məsələlərinə ciddi təsir göstərə bilər.
Politoloq Samir Hümbətov Sherg.az-a deyib ki, İsrail, şübhəsiz ki, husilərin “Scarlet Ray" neft tankerinə zərbəsinə cavab verəcək:
"İsrail həmin qruplaşmanın hərbi bazasını, dinc yaşayış yerlərini və ya hücum üçün əl olan tərəfləri hədəf ala bilər. Bu, hələ ki, qapalı məsələdir. Lakin İsrail oturub gözləyərək bu məsələyə seyirci qalmaz. İsrail yaxın zamanlarda Yəmənə ardıcıl hücumlar həyata keçirə bilər. Məsələ burasındadır ki, İsrailin Yəmənə hücumları daha çox hava hücumları olacaq, quru və dəniz əməliyyatları isə çətinləşir. Çünki boğazdan keçmək üçün İran faktoru ortaya çıxır. Quru əməliyyatı mümkün olsa da, əsasən hava əməliyyatları həyata keçiriləcək ki, adekvat zərbələr endirilsin. Bu hücumlar ya hərbi, ya mülki, ya da strateji obyektlərə yönələ bilər".
