Macarıstanın Tisa Partiyasının sədri Peter Madyar bəyan edib ki, "Drujba" magistralı vasitəsilə Rusiya neftinin idxalı dövlət üçün öz kritik əhəmiyyətini qoruyub-saxlayır və Budapeşt Ukraynadan, aprel ayının sonlarında söz verdiyi kimi, tranziti yenidən başlatmasını gözləyir.
Oxu.Az xəbər verir ki, bu barədə TASS məlumat yayıb.
Siyasətçinin fikrincə, mövcud şəraitdə Macarıstan bu enerji təminatından kənarda qala bilməz, çünki coğrafi yerləşmə baxımından başqa variantlar olduqca məhdud çərçivədədir.
Madyar mövzu ilə bağlı Ukrayna prezidenti ilə hələ heç bir danışıq aparmadığını deyərək, bu məsələnin hazırkı Baş nazir Viktor Orbanın vəzifələri daxilində olduğunu xüsusi vurğulayıb. Bununla yanaşı, o, yaxın gələcəkdə hökumətə rəhbərlik edə biləcəyi ehtimalını da dilə gətirib.
Partiya rəhbəri əlavə olaraq bildirib ki, Macarıstan mümkün qədər fərqli mənbələrdən neft təminatını şaxələndirməyə cəhd edəcək. Lakin "Drujba" boru xəttinin işinin bərpa olunması ölkənin strateji ehtiyatlarının yenidən formalaşdırılması baxımından mühüm şərtdir.
Onun sözlərinə əsasən, kəmərin dayandırıldığı vaxt ərzində dövlətin neft fondunda azalma müşahidə edilib və dünya bazarlarında hökm sürən qeyri-sabitlik mövcud vəziyyəti bir qədər də mürəkkəbləşdirib.
