“Moldova prezidenti Maya Sandu ölkə vətəndaşlarına qarşı törətdiklərinə görə cəzalandırılacaq”.
Teleqraf xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.
“Düşünürəm ki, hər kəs öz haqqına düşəni alacaq. Sandu da Moldovada etdiklərinə və vətəndaşlara qarşı törətdiklərinə görə layiqli cavabını alacaq”, -o bildirib
Diplomat iddia edib ki, Moldovanın sakinləri “hazırkı faciəvi vəziyyətin girovu”na çevriliblər.
“Onlar sülh, bütün dövlətlərlə qonşuluq münasibətləri istəyirlər. Amma onların fikri Sandunun rəhbərlik etdiyi hakimiyyət tərəfindən görməməzdən gəlinir və saxta “Avropa yolunun dönməzliyi” şüarı ilə əvəz olunur. Əslində, bu dönməzlik Moldovanı yoxsulluğa və borc asılılığına aparır”.
O qeyd edib ki, 2025-ci ilin ilk altı ayında Moldovanın xarici borcu 10,5 faiz artaraq təxminən 11,5 milyard dollara çatıb: “Bu, Moldovanın gələcək nəsilləri üçün dözülməz bir yükdür. Ekspertlərə görə, bu qədər fəlakətli göstəricilərlə Moldovanın Avropa İttifaqına üzvlük perspektivi sadəcə reallıqla heç bir əlaqəsi olmayan siyasi şüardır. İnsanlara bu məlumatı vermirlər, əvəzində onlara başqa şey deyirlər: guya bir az da dözmək lazımdır, bir az da kəməri sıxmaq gərəkdir, guya onda Avropa İttifaqı və NATO-nun “liberal demokratiya”sı çərçivəsində böyük gələcək əldə olunacaq. Amma hansı bədələ? Sadəcə moldovan xalqının məhvi bahasına?”.
