Çin üçün Rusiya-Ukrayna müharibəsində qızıl ortanı tapmaq çətindir
Ukraynanın Xarici işlər naziri Dmitri Kuleba çinli həmkarı Vang Yi ilə telefon danışığında Rusiyanın Ukrayna torpaqlarını işğalı və Buça qətliamı barədə müfəssəl məlumat verib. Vang Yi Kulebaya bildirib ki, müharibənin davamı beynəlxalq ticarətə və qida təhlükəsizliyinə zərbə vurur. Müharibəyə qədər Çinin Ukraynadan qida məhsullarının idxalıyla bağlı böyük planları var idi. Hazırda bunları reallaşdırmaq mümkün deyil. Nazirlərin telefon danışığı ilə bağlı Çin Xarici İşlər Nazirliyi də açıqlama yayımlayıb. Açıqlamada müharibənin dayandırılmasının Avropa təhlükəsizliyi üçün vacib olduğu vurğulanıb: “Müharibə bütün hallarda bitəcək. Əsas məsələ bundan sonra bölgədə təhlükəsizliyin təminatıdır”.
“Atlas” Araşdırmalar Mərkəzinin rəhbəri Elxan Şahinoğlu “Şərq”ə bildirib ki, Moskvanın strateji tərəfdaşı olan Pekin Ukraynada müharibənin uzanmasından narahatlığını açıq formada ortaya qoyub. Analitik deyib ki, Ukrayna və Çin xarici işlər nazirləri müharibə başlayandan bəri ikinci dəfədir telefonla danışırlar:
“Kiyevin Pekindən iki gözləntisi var. Birincisi, Kiyev istəyir ki, Pekin Rusiyanın işğalçı müharibəsindən məsafə saxlasın, bunu dəstəkləməsin. İkincisi, Pekin müharibənin dayandırılması üçün Kremlə təsir etsin. Pekin ehtiyatlıdır. Çin nə Kremlin işğalçı müharibəsini pisləyir, nə də müharibəyə haqq qazandırır. Ancaq Pekin üçün Rusiya-Ukrayna müharibəsində qızıl ortanı tapmaq çətindir. Çünki bir tərəfdə işğalçı, digər tərəfdə işğala məruz qalan dövlət dayanıb. Bu ikisi arasında bərabərlik işarəsi qoymaq problematikdir”.
