Ukraynanın ərazi bütövlüyü çərçivəsində sülh sazişinin imzalanma ehtimalı artmağa başlayıb
Rusiya Prezidenti Vladimir Putin Amerika lideri Donald Trampla danışıqlar aparıb. Bu barədə Kremlin mətbuat katibi Dmitri Peskov brifinqdə deyib.
Peskov bildirib ki, prezident Putin və ABŞ Prezidenti Donald Tramp az öncə telefon danışığını tamamladılar. Bu, çox uzun telefon danışığı idi, demək olar ki, bir saat yarım davam etdi.
Vladimir Putin və Donald Tramp telefon danışığında şəxsi təmasları davam etdirmək və şəxsi görüş təşkil etmək barədə razılığa gəliblər. Qeyd edək ki, Tramp bundan əvvəl də Putinlə telefon danışığı apardığını açıqlamış, ancaq Peskov bu məlumatı təsdiq və ya təkzib etməmişdi.
“Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli “Sherg.az”a bildirib ki, bütün proseslər Amerikanın yeni prezidenti Donald Trampın Rusiyanı addım-addım geri çəkilməyə məcbur etdiyini göstərir:
“Yəni Kremlin böyük ümidlə gözlədiyi proses demək olar ki, baş verməyib. Moskvada ümid edirdilər ki, Tramp administrasiya hakimiyyətə gələn kimi Ukraynanın ərazi bütövlüyü hesabına, Rusiyanın maraqlarına uyğun sülh sazişinin imzalanmasını təmin edəcək. Həmçinin Trampın rəsmi Kyevi də sülhə məcbur edəcəklərini düşünürdülər. Lakin Kremlin düşündüyü baş vermədi. Artıq proses addım-addım aparılır. Həmçinin Tramp Rusiyanın çökmə mərhələsində olmasından duyuq düşüb və bu barədə geniş məlumatlar alıb. Buna görə də Tramp Rusiyanı mövcud situasiyanın nə qədər ağır olduğunu inandıraraq geri çəkilmək məcburiyyətində qoyur. Tramp telefon danışıqlarında müəyyən təminatlar almalıdır ki, Putinlə görüşməyin onun üçün əhəmiyyəti olsun. Əgər Tramp Putinlə görüşəcəksə, deməli, hər iki tərəf Ukrayna savaşının dayandırılması istiqamətində hamını qaneə edəcək şərtlər açıqlamaq barədə razılaşacaqlar. Əks halda Tramp Putinlə nəticəsiz və mənasız görüş keçirtməz. Telefon danışıqları Rusiyanın geri çəkilməsinə yönəlik mesajların verilməsinə hesablanıb və bu istiqamətdə müəyyən əlamətlər hiss olunmağa başlayıb. Rusiya əvvəlki qədər sərt mövqe tuta bilmədiyini gizlətməkdə çətinlik çəkir və tədricən geri çəkilir. Ukraynanın ərazi bütövlüyü çərçivəsində sülh sazişinin imzalanma ehtimalı artmağa başlayıb. Tramp-Putin görüşü Rusiyanın ABŞ-nin qoyduğu şərtlər daxilində sülhə getməyə yaxınlaşması deməkdir”.
