Rusiya İstintaq Komitəsi Moskva vilayətinin Balaşixa şəhərində avtomobilin partladılması nəticəsində Rusiya Müdafiə nazirliyinin general-leytenantı Yaroslav Moskalikin ölümü ilə bağlı cinayət işi açıb.
APA-nın Moskva müxbiri xəbər verir ki, Rusiya İstintaq Komitəsi generalın ölümü ilə nəticələnən baş vermiş hadisəni qətl kimi tövsif edib.
Həmçinin, komitədən bildirilib ki, avtomobildə partlayıcı qurğu işə düşüb.
Qeyd edək ki, bu gün səhər 10:40 radələrində Moskva vilayətinin Balaşixa şəhərində yaşayış binasının qarşısında park edilmiş vəziyyətdə olan “Volksvgen” avtomobili partlayıb. Güclü partlayış nəticəsində avtomobilin yaxınlığından keçən bir nəfərin həlak olduğu bildirilib. Rusiya mətbuatı bir qədər sonra partlayış nəticəsində həlak olan şəxsin Rusiya Federasiyası Silahlı Qüvvələri Baş Qərargahının Baş Əməliyyat İdarəsinin rəis müavini, general-leytenant Yaroslav Moskalik olması barədə məlumat yayıb. 59 yaşlı generalın 2021-ci ildən Rusiya Silahlı Qüvvələri Baş Qərargahının Baş Əməliyyat İdarəsinin rəis müavini vəzifəsini tutduğu bildirilib.
13:33
Moskva vilayətinin Balaşixa şəhərində avtomobilin partlaması nəticəsində Rusiya Federasiyası Silahlı Qüvvələri Baş Qərargahının Baş Əməliyyat İdarəsinin rəis müavini Yaroslav Moskalikin öldüyü məlum olub.
APA-nın Rusiya bürosu xəbər verir ki, bu barədə yerli KİV məlumat yayıb.
Bildirilib ki, partlayış nəticəsində Müdafiə Nazirliyinin 59 yaşlı generalı Yaroslav Moskalik həlak olub.
Onun 2021-ci ildən Rusiya Silahlı Qüvvələri Baş Qərargahının Baş Əməliyyat İdarəsinin rəis müavini vəzifəsini tutduğu bildirilib.
***
12:50
Moskva vilayətinin Balaşixa şəhərində yaşayış binasının həyətində avtomobil partlayıb.
APA-nın Rusiya bürosu yerli teleqram kanallarına istinadən xəbər verir ki, partlayışın mənbəyi park edilmiş “Volkswagen”in içərisində olub.
Bunu avtomobilə ilkin baxışın nəticələri və dəymiş ziyanın xarakteri göstərir. Hazırda iki versiya nəzərdən keçirilir: partlayıcı qurğu və içəridə yerləşən qaz balonunun partlaması.
Avtomobilin dam örtüyü tamamilə qopub, gövdəsi isə sona qədər yanıb.
İlkin məlumatlara görə, təsadüfi yoldan keçən bir nəfər həlak olub.
Partlayışın səbəbini müəyyən etmək üçün hadisə yerinə əməliyyat-istintaq qrupu gəlib.
Hadisə yerindən kadrlar sosial şəbəkələrdə yayımlanır.
