Türkiyənin xarici işlər naziri Mövlud Çavuşoğlu Rusiya prezidenti Vladimir Putin və Ukrayna rəhbəri Volodimir Zelenskinin görüş ehtimalından bəhs edib.
O, bunun Moskva rəhbərinin qərarından asılı olduğunu bildirib:
“Bu, hər iki liderin, xüsusilə Putinin “hə” deməsindən asılıdır. Əslində, o, “yox” deməyib. Doğrudur, son günlər baş verənlər gərginliyi bir az da artırıb. Tərəflərin görüşməsi üçün tələblər arasındakı fərq azalmalıdır. Bu istiqamətdə isə səylər davam edir”.
M.Çavuşoğlu həmçinin Türkiyə Prezidenti Rəcəb Tayyib Ərdoğanla rusiyalı və ukraynalı həmkarları arasında telefon danışığının baş tutacağını söyləyib.
Mövzu ilə bağlı “Sherg.az”a danışan politoloq Turab Rzayev vurğulayıb ki, burada iki əhəmiyyətli məqam var:
“Birincisi Putinlə Zelenski görüşüb müharibəni bitirə bilər. Əsas məqam ondan ibarətdir ki, Ukrayna rəhbəri tələsmir. Deyir ki, biz hələ Rusiyaya bir neçə böyük məğlubiyyət yaşatmalıyıq ki, onlar bunu bitirməyə hazır olsun. Düşünürəm ki, Zelenski, xüsusilə, “Moskva” kreyseri vurulandan sonra artıq şəraitin yetişdiyini, şimal qonşumuzun geri addım atacağını və öz zəifliyini qəbul edib sülh masasına oturacağını düşünür”.
Politoloq Türkiyənin rolunu izah edib:
“İkinci məsələ ondan ibarətdir ki, prezidentlərin görüşünü Çavuşoğlunun dilə gətirməsi çox önəmlidir. Çünki Türkiyə Kreml hakimiyyəti və Ukraynanı istər Antalya Diplomatiya Forumunda, istər daha fərqli məcralarda bir araya gətirərək dünyada öz sözünü deyən sülh yaratma missiyası olan hətta Rusiya kimi ölkəni belə barışığa dəvət edə biləcək ölkə olduğunu nümayiş etdirib. Türkiyə artıq dünyada əsaslı rola malikdir. Hər iki ölkəni bir araya gətirə, barışdıra bilər. Hansı ki, bunu nə Qərb, nə də Avropa dövlətləri bacardı”.
