Rusiyalıların əksəriyyəti hesab edir ki, hər bir insan imkanları daxilində xeyriyyəçiliklə məşğul olmalıdır. Sherg.az xəbər verir ki, Ümumrusiya İctimai Rəyin Öyrənilməsi Mərkəzinin (VTsİOM) Analitik Mərkəzinin araşdırmasına əsasən, respondentlərin 77%-i bu fikirdədir.
Son 20 il ərzində bu yanaşmanı dəstəkləyənlərin sayı 21 faiz bəndi artıb. Eyni zamanda, xeyriyyəçiliyin ilk növbədə maddi imkanları olan insanların işi olduğunu düşünənlərin payı 17%-ə qədər azalıb. Bu göstərici 2006-cı illə müqayisədə 24 faiz bəndi aşağıdır.
Sorğuda iştirak edənlərin hər ikisindən biri hesab edir ki, xeyriyyəçilər yardımı kimə və hansı məqsədlər üçün yönəldəcəklərinə özləri qərar verməlidirlər. Respondentlərin 51%-i bu mövqeyi dəstəkləyib ki, bu da 20 il əvvəlki göstəricidən 7 faiz bəndi çoxdur.
Rusiyalıların daha 48%-i hesab edir ki, xeyriyyəçilik təmənnasız xarakter daşımalı və dövlət tərəfindən təşviq edilməsinə ehtiyac yoxdur. Son iki onillikdə bu mövqeyi dəstəkləyənlərin payı 10 faiz bəndi artıb.
Araşdırma 13 sentyabr tarixində 1600 yetkinlik yaşına çatmış Rusiya vətəndaşı arasında telefon müsahibəsi metodu ilə keçirilib. 95% etibarlılıq ehtimalı ilə maksimal xəta həddi 2,5%-dən çox deyil.
Qeyd edək ki, Rusiyada oktyabrın 1-dək davam edəcək “Xeyriyyəçi sentyabrı #МЫВМЕСТЕ” aksiyasına start verilib. Aksiyanın iştirakçıları ehtiyacı olan insanlara yardım edə, könüllü fəaliyyətə qoşula, xeyriyyə fondlarını dəstəkləyə və ya öz sosial layihələrini təşkil edə bilərlər. Aksiya Beynəlxalq Xeyriyyəçilik Gününə həsr olunub və mütəmadi qarşılıqlı yardımın inkişafına yönəlib.
