Sentyabrın 3-də səhər saatlarında Rusiyanın Krasnoyarsk diyarında R-257 “Yenisey” federal avtomobil yoluna qar yağıb. Bu, yaxınlarda başa çatan yay mövsümündən sonra Rusiyada yağan ilk qar olub. Hazırda güclü küləyin əsdiyi və temperaturun sıfır dərəcəyə yaxın olduğu Yermakovski rayonunu əlverişsiz hava şəraiti bürüyüb.
Sherg.az xəbər verir ki, sinoptiklər daha əvvəl regionun mərkəzi və cənub ərazilərində temperaturun mənfi 3 dərəcəyədək kəskin aşağı düşəcəyi barədə xəbərdarlıq etmişdilər. Lakin yağış əvəzinə Sayan dağlarında və dağətəyi ərazilərdə qar yağmağa başlayıb. Ən mürəkkəb vəziyyət yolun 590-cı və 620-ci kilometrləri arasındakı hissəsində yaranıb. Yağıntı və güclü külək səbəbindən asfalt örtüyündə buz bağlaması ehtimalı var ki, bu da nəqliyyat vasitələrinin hərəkətini təhlükəli edir.
Dövlət Yol Hərəkəti Təhlükəsizliyi Müfəttişliyi (DYP) avtomobillərində hələ də yay təkərləri quraşdırılmış sürücülərə səfərlərdən çəkinməyi qətiyyətlə tövsiyə edib. Yolda olan sürücülərə isə son dərəcə diqqətli olmaq və qəfil manevrlər etməmək məsləhət görülüb.
