“Sputnik Azərbaycan” təcrübəsi hüquqi islahatlara təkan verdi
Mülki Məcəllədə, İnzibati Xətalar Məcəlləsində, “Media haqqında” və “Hüquqi şəxslərin dövlət qeydiyyatı və dövlət reyestri haqqında” qanunlarda dəyişiklik edilməsi barədə qanun layihəsi üçüncü oxunuşda təsdiqlənib. Layihə Milli Məclisin iyulun 14-də keçirilən iclasının gündəliyinə daxil edilib.
Sənədə əsasən, “Media haqqında” Qanunda “Media subyekti” anlayışı Azərbaycanda xarici media subyektlərinin filial və nümayəndəliklərini də əhatə etməsi məqsədilə genişləndirilib. Qanun layihəsində bu istiqamətdə bir sıra digər dəyişikliklər də öz əksini tapıb.
Azərbaycan Mətbuat Şurası İdarə Heyətinin üzvü, "Bakı-Xəbər" qəzetinin baş redaktoru, jurnalist Aydın Quliyev mövzu ilə bağlı Sherg.az-a açıqlama verib:
""Media haqqında" Qanun Azərbaycanda ilk təcrübədir. "Kütləvi İnformasiya Vasitələri haqqında" Qanun müstəqillikdən bir neçə il sonra qəbul olundu, amma yeni media seqmentlərinin yaranması ilə əlaqədar sözügedən qanunda dəyişikliklərə tələbat yarandı. Bu baxımdan Medianın İnkişafı Agentliyinin yeni qanunu qəbul etməsi yaxşı oldu.
Qanun bir neçə ildir ki, fəaliyyətdədir. Onun fəaliyyət göstərdiyi müddətdə praktikada müəyyən məsələlər meydana çıxdı. Bu məsələlər praktik yenilənmələrə və dəyişikliklərə uyğun olaraq "Media haqqında" Qanunda təkmilləşdirilməyə ehtiyac hiss olunduğunu təsdiq etdi. Bu cəhətdən xarici media orqanları ilə bağlı həmin qanunda dəyişikliyin edilməsi zəruri idi".
Aydın Quliyev praktikada bir neçə ay əvvəl "Sputnik Azərbaycan" və digər media orqanları ilə bağlı müəyyən spesifik vəziyyətlərin müşahidə edildiyinə də diqqət çəkib:
"Bu cür spesifik vəziyyətlərin qanuni yolla tənzimlənməsi üçün bizim qanunvericilikdə dəyişikliklər aparmağa ehtiyac var idi. "Media haqqında" Qanunda həyata keçirilən dəyişiklik xarici media orqanlarının da Azərbaycanda media reyesterindən keçməsini zəruri bir prosedura çevirir. Bu eyni zamanda həm informasiya məkanının tənzimlənməsi üçün şərait yaradır, informasiya məkanında xaosun yaranmasına imkan vermir, həm də Azərbaycan üçün informasiya məkanının daha təhlükəsiz vəziyyətinə təminat yaradır".
Baş yazar sonda bu dəyişiklərin edilməsinin vacib olduğunu bir daha vurğulayıb.
