Ankarada 20 yanvar faciəsinin şəhidləri yad edilib.
Sherg.az xəbər verir ki, Azərbaycan Respublikasının Türkiyədəki Səfirliyinin, Türkiyə-Azərbaycan Dostluq, Əməkdaşlıq və Həmrəylik Fondunun (TADİV) və Türk Dövlətləri Təşkilatının birgə təşkilatçılığı ilə keçirilən anım tədbiri şəhidlərin əziz xatirəsinə bir dəqiqəlik sükut və iki ölkənin dövlət himnləri ilə başlayıb.
Azərbaycanın müstəqilliyi və ərazi bütövlüyü uğrunda canından keçən şəhidlərin ruhuna Qurani-Kərim oxunmasından sonra, 20 yanvar faciəsinin mahiyyətini əks etdirən qısa film nümayiş etdirilib.
Səfirliyin müşaviri Eldar Əliyev açılış çıxışında 1990-cı ilin 20 yanvar tarixində müstəqllik uğrunda ayağa qalxan sivil xalqın səsinin bütün dünyanın gözü önündə qanla boğulduğunu qeyd edərək, Azərbaycana qarşı yürüdülən ikili standartlara diqqət çəkib.
O, Ümummilli liderin Azərbaycanın Moskvadakı nümayəndəliyinə gələrək Sovet rejiminin qanlı siyasətinə etiraz etdiyini vurğulayaraq, Azərbaycanın müstəqilliyini məhz həmin tarixdə qazandığını qeyd edib.
TADİV sədri Aygün Attar çıxışında 20 yanvarı Azərbaycan tarixinin qəhrəmanlıq səhifəsinin yazıldığı tarix adlandıraraq, Azərbaycanının yalnız öz müstəqilliyi uğrunda mübarizə aparmadığını, Sovet rejimi tərəfindən istismar edilən türk xalqlarının da istiqlal yolunu açdığını ifadə edib.
Türkiyə Respublikası Prezidentinin müşaviri Yalçın Topçu çıxış edərək, 20 yanvar faciəsinin matəm günü olmaqla yanaşı, azadlığa gedən yolun başlanğıcı olduğunu, şəhidlərin qanının Sovet imperiyasını çökdürdüyünü bildirib.
Ankara Hacı Bayram Vəli Universitetinin professoru Zakir Avşar 20 yanvar tarixinin mahiyyəti və Azərbaycan tarixində yerinə dair geniş çıxış edib.
Türk Dünyası Parlamentarilər Fondunun sədri Abdullah Çalışkan, Mərmərə Qrupu Strateji və Sosial Araşdırmalar Fondunun sədri Akkan Suver və Türkiyənin gənclik və idman nazirinin müavini Safa Koçoğlu da mövzu ilə bağlı çıxışlarını ediblər.
Anım mərasiminin sonunda “Qanlı yanvar” fotosərgisinin açılışı olub.
Tədbirdə Türkiyədən dövlət rəsmiləri, ictimai xadimlər, ziyalılar, qeyri-hökumət təşkilatlarının təmsilçiləri iştirak ediblər.
