Rəşad Mahmudov: “Vicdansızlıq anlayışı həkimlərin peşə nüfuzuna zərər vura bilər”
“İnzibati Xətalar Məcəlləsinə təklif edilən tibb işçilərinin vicdansız münasibəti termini bizi narahat etməlidir”. Bunu Milli Məclisin iclasında deputat Rəşad Mahmudov deyib. Deputat bildirib ki, qanunvericilik yalnız faktla sübut edilmiş konkret əmələ və nəticəyə əsaslanır:
“Subyektiv, etik mülahizələrə əsaslanma yoxdur. Tibbi səhlənkarlıq üçün qanunda kifayət qədər mexanizm var. Biz vətəndaşların sağlamlığının qorunmasını tam dəstəkləyirik. Ancaq bu kimi qərarlar, xüsusilə subyektiv dəyərlərlə, vicdansızlıq anlayışı ilə həkimlərin peşə nüfuzunun qorunması baxımından problemlərin yaranmasına səbəb ola bilərik. Biz bir həkimə deyirik ki, intuisiyana güvən, sonra da deyirik ki, səni buna görə cəzalandıracağıq”.
Qeyd edək ki, Milli Məclisin dünənki plenar iclasında İnzibati Xətalar Məcəlləsinə təklif edilən dəyişiklik layihəsinə əsasən, tibb işçisinin işə vicdansız və ya laqeyd münasibəti nəticəsində öz peşə vəzifəsini yerinə yetirməməsi və ya lazımi qaydada yerinə yetirməməsi ehtiyatsızlıqdan şəxsin sağlamlığına yüngül zərər vurulmasına səbəb olduqda fiziki şəxslər beş yüz manatdan səkkiz yüz manatadək məbləğdə, vəzifəli şəxslər min manatdan min beş yüz manatadək məbləğdə, hüquqi şəxslər yeddi min manatdan doqquz min manatadək məbləğdə cərimə ediləcək. Qanun layihəsi birinci oxunuşda qəbul edilib.
