Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Tehranda keçirilən “Tehran Dialoq Forumu” çərçivəsində İranın “Tasnim” agentliyinə müsahibə verib.
Teleqraf xəbər verir ki, o forumun yüksək səviyyədə təşkilinə görə İran tərəfinə təşəkkür edib:
"Belə vacib bir forumun təşkilinə görə iranlı həmkarlarımıza təşəkkür edirəm. Azərbaycan nümayəndə heyətinin dəvət olunması iki ölkə arasında dostluq və qonşuluq münasibətlərinin göstəricisidir. Tədbir çərçivəsində həm ikitərəfli, həm də çoxtərəfli müzakirələr aparılır. Azərbaycanla İran arasında münasibətlər yeni bir inkişaf mərhələsinə qədəm qoyub. İran Prezidenti cənab Pezeşkiyanın Azərbaycana rəsmi səfəri və Prezident İlham Əliyevlə keçirilən görüşlər bu əlaqələrin genişlənməsinə ciddi təkan verib. Forum çərçivəsində regional məsələlərlə yanaşı, iki ölkə arasında əməkdaşlığın gələcək perspektivləri də müzakirə olunur.
Ermənistanla münasibətlərə toxunan Hikmət Hacıyev qeyd edib ki, regionda sülh üçün yeni imkanlar yaranıb:
“Azərbaycanın həyata keçirdiyi siyasət nəticəsində işğala son qoyulub, ərazi bütövlüyümüz təmin edilib. Cənubi Qafqazda yeni status-kvo formalaşıb. Bu reallıq beynəlxalq hüquq normalarına əsaslanır və sülh üçün münbit şərait yaradıb. Ermənistanla sülh müqaviləsinin əsasını təşkil edən beş prinsip Azərbaycan tərəfindən hazırlanaraq qarşı tərəfə təqdim olunub. Bu, Azərbaycanın sülh gündəminə sadiqliyinin bariz nümunəsidir. Sənədin mətni razılaşdırılıb, lakin hələ də açıq məsələlər qalır. Ermənistanın konstitusiyasında Azərbaycana qarşı ərazi iddialarına son qoyulmalıdır ki, davamlı sülhə nail olaq. Faktiki olaraq regionda sülh hökm sürür. İndi əsas məsələ bu sülhü hüquqi çərçivəyə salmaqdır. Azərbaycan bu istiqamətdə səylərini davam etdirəcək”.
