Qəfil ölüm riski yüksək olan məşhur idman növü açıqlanıb.
“Medicina” xəbər verir ki, professional bodibildinq xüsusilə elit idmançılar arasında ani ürək ölümü riskini əhəmiyyətli dərəcədə artıra bilər. Padua Universitetinin alimləri belə qənaətə gəliblər.
Peşəkar bodibilderlərin qəfil ürək ölümü riski 14 dəfə yüksəkdir.
Tədqiqatçılar səkkiz il ərzində toplanmış 20 mindən çox bodibildinqçinin sağlamlıq məlumatlarını təhlil ediblər.
Müşahidə dövründə əsasən ürək dayanması nəticəsində 73 qəfil ölüm halı qeydə alınıb.
Müəlliflərin fikrincə, ən böyük təhlükə beynəlxalq səviyyəli yarışların iştirakçıları arasında müşahidə olunur: onlar üçün ürək çatışmazlığı riski həvəskarlarla müqayisədə 14 dəfə yüksək idi.
Bəzi hallarda səbəb anabolik steroidlərdən və digər dərmanlardan sui-istifadə olsa da, ölənlərin əksəriyyətinin ürəyində patoloji dəyişikliklər, o cümlədən sol mədəciyin divarının qalınlaşması və orqanın ümumi kütləsinin əhəmiyyətli dərəcədə artması müşahidə olunub.
Alimlər vurğulayırlar ki, həddindən artıq fiziki fəaliyyət, sərt pəhrizlər və stimulantlar ürək-damar sisteminə ciddi yük yaradır.
Tədqiqatçılar idman federasiyalarını və tibb ictimaiyyətini, xüsusən də peşəkar səviyyədə idmançıların sağlamlığının monitorinqi və qəfil ölümün qarşısının alınması üçün təcili olaraq rəsmi tövsiyələr hazırlamağa çağırır.
